ოთარ სირაძე - ბიძინა ივანიშვილი ოთარ ფარცხალაძის, კახა კალაძისა და სხვების მეშვეობით, ბიზნესების მაფიოზური გზით წართმევით არის დაკავებული

ბიძინა ივანიშვილი კომპანია შპს „ჯორჯიან მანგანეზის“ ხელში ჩაგდებას ცდილობს, რომლის მფლობელი ამერიკული კომპანიაა და რომელიც ჭიათურის მანგანუმს, ზესტაფონის ფეროსა და ვარციხე ჰესს აერთიანებს , - ამის შესახებ ”ერთიანი ნაციონალური მოძრაობის” წევრმა ოთარ სირაძემ განაცხადა. სირაძის განცხადებით, ამ პროცესში ჩართულია სასამართლო, ფინანსური პოლიცია, საგადასახადო ინსპექცია, გარემოს დაცვისა და ენერგეტიკის სამინისტრო. მისივე განცხადებით, ეს არის მაფიოზური სქემით, სახელმწიფო უწყებების გამოყენებით ბიზნესის წართმევა, ხოლო ამ სქემის შემსრულებელი და ზედამხედველი ოთარ ფარცხალაძეა.

„დღეს ქართული ეკონომიკა ღრმა კრიზისშია, არ შემოდის ინვესტიციები, არ იქმნება სამუშაო ადგილები, თუმცა ყველას გვახსოვს „ქართული ოცნების“ ცრუ დაპირებები ბიზნესის აყვავებაზე, საწარმოების აგუგუნებაზე, მილიარდობით ინვესტიციებზე, ახალ სამუშაო ადგილებზე. სინამდვილეში კი, მთავრობის არაფორმალური მმართველი ოლიგარქი ივანიშვილი ოთარ ფარცხალაძის, კახა კალაძისა და სხვების მეშვეობით, დაკავებულია ბიზნესების მაფიოზური გზით წართმევით და მათი ხელში ჩაგდებით.

დღეს წარმოგიდგენთ შპს „ჯორჯიან მანგანეზის“ მაგალითს, რომლზეც მოდის ქვეყნის ექსპორტის 20% და რომლის მფლობელი ამერიკული კომპანია „ჯორჯიან ემერიქან ელოიზია“. მას განხორციელებული აქვს ასობით მილიონი დოლარის ინვესტიცია საქართველოში, დასაქმებული ჰყავს 5 500 თანამშრომელი, რომელიც აერთიანებს სამ კომპანიას - ჭიათურ მანგანუმს, ზესტაფონის ფეროს და ვარციხე ჰესს. იგი წარმოადგენს სტრატეგიულ კომპანიას. ამ მიმზიდველობამ, როგორც ჩანს, დიდი ინტერესი გაუჩინა ივანიშვილს და მისი ხელში ჩაგდება მოინდომა, რასაც ის მთელი რიგი სახელისუფლებო სტრუქტურების მონაწილეობით ახორციელებს. სასამართლო, ფინანსური პოლიცია, საგადასახადო ინსპექცია, გარემოს დაცვის სამინისტრო, ენერგეტიკის სამინისტრო - ყველა ეს უწყება დაკავებულია ამ კომპანიისთვის ხელოვნურად პრობლემების შექმნაში.

თავდაპირველად, აბსურდული ეკოლოგიური ბრალდებით, კომპანია ჯერ დააჯარიმეს 480 მლნ ლარით, ხოლო შემდეგ ამ მოტივით კომპანიაზე აღძრეს სისხლის სამართლის საქმე 192-ე (ლიცენზიის პირობების დარღვევა), იმ დროისთვის უკვე ამნისტირებული მუხლით. ეს ეხება ნიადაგის დეგრადაციით გამოწვეულ ზიანს, მაშინ როდესაც ანალოგიურ საქმიანობას ეწევა „არემ-ჯი გოლდი“, თუმცა იქ შემოწმებაზე არავინ შედის, რადგან იქ ივანიშვილის ინტერესია, ან თუნდაც ნებისმიერი სამშენებლო კომპანია, რომელიც ავტობანის მშენებლობაზეა დაკავებული. ეს არის შერჩევითი მიდგომა სასურველი ქონების ხელში ჩაგდების მიზნით, როგორც მოხდა „თბილგაზში“, სადაც კალაძის სანათესაო მართავს კომპანიას და რისი მცდელობაც იყო რ2-ში.

ამის შემდეგ, შპს „ჯორჯია მანგანეზს“ დააკისრეს საგადასახადო ჯარიმა 200 მლნ ლარის ოდენობით, რომელთან დაკავშირებითაც მიმდინარეობს სასამართლო დავები, რომლის სანდოობასაც კომპანია ეჭვის ქვეშ აყენებს და ემზადება საერთაშორისო არბიტრაჟში გასასაჩივრებლად. დიდი ალბათობით, ეს დავა დასრულდება კომპანიის სასარგებლოდ, რაც ჩვენი ქვეყნის ბიუჯეტს დაუჯდება ძვირი, ხოლო ქვეყნის იმიჯი კიდევ ერთხელ დაზიანდება. ეს მხოლოდ იმისთვის, რომ ოლიგარქმა ივანიშვილმა დაიკმაყოფილოს თავისი ხარბი სურვილები.

ბოლოს უკვე სახელმწიფომ ამ მოტივების გამოყენებით კომპანიას დაუნიშნა დროებითი მმართველი ნიკოლოზ ჩიქოვანის სახით, რომელიც წარმოადგენს გიორგი კაპანაძის ნდობით აღჭურვილ პირს, ხოლო თავად კაპანაძე კი მეტსახელად „რიჟა“ წარმოადგენს ოთარ ფარცხალაძესთან და ხელისუფლებასთან დაახლოებულ პირს. აღსანიშნავია ისიც, რომ სწორედ ეს კაპანაძე მართავდა ზესტაფონის ფეროს შევარდნაძის დროს, ის წარმოადგენდა ნუგზარ შევარდნაძის კლანს, რომლებმაც გაკოტრებამდე მიიყვანეს კომპანია. ასევე ნიშანდობლივია ისიც, რომ ვიდრე ივანიშვილი ავანსცენაზე გამოიყვანდა ქიბარ ხალვაშს რ2-ს საქმესთან დაკავშირებით, იგი სწორედ კაპანაძის მეშვეობით ცდილობდა რ2-ს ხელში ჩაგდებას.

ეს არის კლასიკური მაგალითი მაფიოზური სქემით ბიზნესის წართმევისა, არაფორმალური მმართველის მიერ სახელმწიფოს გამოყენებით, ხოლო ამ მაფიოზური სქემის შემსრულებელი და ზედამხედველი არის ოდიოზური ფიგურა ოთარ ფარცხალაძე.

„ერთიანი ნაციონალური მოძრაობა“ მოვითხოვთ დაისაჯოს ყველა ის პირი, ვინც ამ უკანონობაშია ჩართული, ასევე შეწყდეს ზეწოლა ბიზნესზე და კონკრეტულად შპს „ჯორჯიან მანგანეზზე“, - განაცხადა ოთარ სირაძემ.