თამარ ჩუგოშვილი - პარლამენტში ძალიან მალე ვიხილავთ შრომის უსაფრთხოებასთან და შრომის ინსპექციასთან დაკავშირებულ კანონპროექტს
პარლამენტში ძალიან მალე ვიხილავთ შრომის უსაფრთხოებასთან და შრომის ინსპექციასთან დაკავშირებულ კანონპროექტს, რომელიც არსებულ გამოწვევებსა და კრიტიკას დიდწილად უპასუხებს , - ამის შესახებ პარლამენეტის პირველმა ვიცე-სპიკერმა თამარ ჩუგოშვილმა სასტუმრო “რედისონში” მიმდინარე კონფერენციაზე განაცხადა, რომლის მთავარ თემას შრომის უფლებების დაცვა წარმოადგენს.
თამარ ჩუგოშვილის ინფორმაციით, შრომითი უფლებების საკანონმდებლო დონეზე უზრუნველყოფის საკითხებთან დაკავშირებით პარლამენტის წევრებსა და მთავრობის წარმომადგენლებს შორის კონსულტაცია გაიმართა.
როგორც თამარ ჩუგოშვილი აცხადებს, ამ ეტაპზე შრომის უსაფრთხოებას და შრომის ინსპექციას არ გააჩნია საკანონმდებლო ბაზა, არ არსებობს კანონის დონეზე განსაზღვრული სტანდარტები და წესები.
“ეს არის მთავარი ამოსავალი, საიდანაც უნდა დავიწყოთ. პირველ რიგში, შესაქმნელია საკანონმდებლო ბაზა. ძალიან მალე პარლამენტში ვიხილავთ კანონს შრომის უსაფრთხოებასთან და შრომის ინსპექციასთან დაკავშირებით, რომელიც დიდწილად უპასუხებს არსებულ გამოწვევებს და კრიტიკას, რაც ამ მიმართულებით არსებობს”, - განაცხადა თამარ ჩუგოშვილმა.