პარტიების ფინანსური აუდიტი, შესაძლოა, აუდიტის სამსახურმა აღარ განახორციელოს
პოლიტიკური პარტიების ფინანსური აუდიტი შესაძლოა აუდიტის სამსახურმა აღარ განახორციელოს.აღნიშნულ საკითხთან დაკავშირებით დღეს დისკუსია პარლამენტის საფინანსო-საბიუჯეტო კომიტეტში გაიმართა, სადაც საკონსტიტუციო ცვლილებების იმ ნაწილზე იმსჯელეს, რომელიც ფინანსების კონტროლს ეხება.
პარლამენტის წევრების მხრიდან დაისვა საკითხი იმის შესახებ, რომ არ არის მიზანშეწონილი პარტიების ფინანსური კონტროლის კომპეტენცია აუდიტის სამსახურს ჰქონდეს მინიჭებული. ანალოგიური იყო თავად აუდიტის სახელმწიფო სამსახურის წარმომადგენლის პოზიციაც.
“აღნიშნულ საკითხთან დაკავშირებით იქნება დამატებითი განხილვები. შეიძლება ვიფიქროთ სხვა ალტერნატიულ გადაწყვეტაზე. ეს შეიძლება იყოს პარლამენტი, რაც ჩემი აზრით მიზანშეწონილი არ არის, ასევე, ეს შეიძლება იყოს ცენტრალური საარჩევნო კომისია“, - განაცხადა პარლამენტის თავმჯდომარემ ირაკლი კობახიძემ.
მისივე თქმით, სადღეისოდ პარტიების ფინანსური კონტროლი ეფექტურად არ ხორციელდება, რასაც თავისი ობიექტური მიზეზები აქვს.
როგორც კობეხიძემ საკომიტეტო განხილვისას განაცხადა, გასული წლის საპარლამენტო არჩევნებისას რა თანხებიც დაიხარჯა, იმის მხოლოდ 20% იყო დეკლარირებული.
“იმისათვის, რომ ზედმიწევნით განხორციელდეს პარტიების სრული ფინანსური კონტროლი, საჭიროა გარკვეული რეპრესიული მექანიზმების ამოქმედება, რაც 2012 წლის პრაქტიკიდან ცუდად გვახსოვს - ამას აქვს თავისი ძალიან დიდი მინუსები“, - აღნიშნა კობახიძემ.