საქართველო რუსეთის საგარეო უწყების კომენტარს ტვირთების მონიტორინგის შესახებ შეთანხმების იმპლემენტაციისგან თავის არიდების მცდელობად აფასებს
საქართველოს საგარეო უწყება რუსეთის საგარეო საქმეთა სამინისტროს კომენტარს აფასებს,
როგორც “საქართველოს მთავრობასა და რუსეთის ფედერაციის მთავრობას შორის საბაჟო ადმინისტრირებისა და სასაქონლო ვაჭრობის მონიტორინგის მექანიზმთან დაკავშირებული ძირითადი პრინციპების შესახებ“ 2011 წლის 9 ნოემბრის შეთანხმების იმპლემენტაციისგან თავის არიდების აშკარა მცდელობას.
როგორც საქართველოს საგარეო საქმეთა სამინისტროს განცხადებაშია აღნიშნული, ქართული მხარე ხაზს უსვამს, რომ შეთანხმების ობიექტსა და მიზანს წარმოადგენს საქართველოსა და რუსეთის ფედერაციას შორის ვაჭრობის მონიტორინგი.
”ხელშეკრულების ხელმოწერის შემდეგ, პარტნიორი ქვეყნის - შვეიცარიის კონფედერაციის ხელშეწყობით, გადაიდგა მნიშვნელოვანი ნაბიჯები ამ დოკუმენტის პრაქტიკული ამოქმედებისკენ.
კერძოდ, არჩეულ იქნა ნეიტრალური კომპანია, რომელმაც უნდა გაწიოს საქართველოსა და რუსეთის ფედერაციას შორის ტვირთბრუნვის საბაჟო მონიტორინგი. საქართველოს კონსტრუქციულობით მოხერხდა ამ კომპანიასთან შესაბამისი კონტრაქტის ტექსტის შეთანხმება, განისაზღვრა რამდენიმე იურიდიული დოკუმენტი პროცესის იმპლემენტაციის ხელშესაწყობად. საქართველოს მიერ კონტროლირებადი ტერიტორიის მხრიდან განისაზღვრა შესაძლო ტერმინალების ადგილმდებარეობა. აღნიშნულით, ჯერ კიდევ ერთი წლის წინ, საქართველომ დაასრულა ყველა წინასწარი პროცედურა ნეიტრალურ კომპანიასთან კონტრაქტის ხელმოწერისთვის და შეთანხმების აღსრულებისთვის.
რუსეთის ფედერაციის საგარეო უწყების კომენტარს მიზანმიმართულად ჩიხში შეჰყავს პროცესი. კერძოდ, რუსეთის მხარე ცდილობს წარმოაჩინოს ოკუპირებული ცხინვალის რეგიონი ზემოხსენებული შეთანხმების მონაწილედ, რაც აშკარად ეწინააღმდეგება ამ შეთანხმების პრინციპებსა და დანიშნულებას. 2011 წელს ორ ქვეყანას შორის გაფორმებული შეთანხმების ამგვარი ინტერპრეტაცია პრინციპულად მიუღებელია ქართული მხარისათვის და ეს იმთავითვე ცნობილი იყო ოფიციალური მოსკოვისათვის.
მოვუწოდებთ რუსეთის ფედერაციას დაუბრუნდეს სამართლებრივ ჩარჩოებს, გადახედოს თავის არაკონსტრუქციულ პოზიციას და შეუდგეს თავისი საერთაშორისო ვალდებულებების უპირობო შესრულებას.
საქართველოს მხარე, მხარს უჭერს რა მსოფლიო ვაჭრობის ორგანიზაციის ერთ-ერთ ფუძემდებლურ პრინციპს საერთაშორისო ვაჭრობის ღიაობის თაობაზე, მოუწოდებს ორგანიზაციის წევრებს პრინციპული შეფასება მისცენ რუსეთის ამ დესტრუქციულ ნაბიჯს და არ დაუშვან 2011 წლის შეთანხმების იმპლემენტაციის პოლიტიზირება”,- ნათქვამია უწყების განცხადებაში.
რუსეთი მიესალმება ოკუპირებული „სამხრეთ ოსეთის“ დე ფაქტო პრეზიდენტის, ანატოლი ბიბილოვის განცხადებას, მონაწილეობა მიიღოს ტვირთების ტრანზიტში ცხინვალის ტერიტორიის გავლით.
სანკტ-პეტერბურგის საერთაშორისო ეკონომიკური ფორუმის ფარგლებში ანატოლი ბიბილოვმა განაცხადა, რომ „სამხრეთ ოსეთი“ მზად არის რუსეთიდან ტვირთების ტრანზიტი უზრუნველყოს, მაგრამ როგორც თანასწორუფლებიანმა პარტნიორმა.
„ყურადღება მივაქციეთ სამხრეთ ოსეთის რესპუბლიკის პრეზიდენტის, ანატოლი ბიბილოვის განცხადებას. მივესალმებით ამ კონსტრუქტიულ და საპასუხისმგებლო პოზიციას, რომელიც ამიერკავკასიაში სავაჭრო-ეკონომიკური კომუნიკაციის განვითარების რეალურ პერსპექტივას წარმოადგენს და რეგიონის ყველა ქვეყნის ინტერესებშია“, - განაცხადეს რუსეთის საგარეო საქმეთა სამინისტროში.
რუსეთის საგარეო უწყებამ ასევე მოუწოდა საქართველოს, „ამგვარი კონსტრუქტიული განწყობა გამოავლინოს“.
„ვგულისხმობთ, პირველ რიგში, რუსეთის ფედერაციასა და საქართველოს მთავრობებს შორის დადებულ შეთანხმებას, საბაჟო ადმინისტრირებისა და საქონლით ვაჭრობის მონიტორინგის შესახებ. ამ შეთანხმების პრაქტიკული რეალიზება მნიშვნელოვან წვლილს შეიტანდა რეგიონში საერთაშორისო ვაჭრობის წარმართვაში. სამწუხაროდ, ქართული მხარე დიდი ხნის განმავლობაში თავს იკავებს შეთანხმების ფარგლებში აღებული ვალდებულებების შესრულებისგან. ვიმედოვნებთ, რომ ეს პოზიცია შეიცვლება“, - აღნიშნეს რუსეთის საგარეო უწყებაში.