ბორდოში ღვინის გამოფენა ”ვინექსპო ბორდო 2017“ იმართება

სოფლის მეურნეობის მინისტრი ლევან დავითაშვილი საფრანგეთის ქალაქ ბორდოში სამუშაო ვიზიტის ფარგლებში ღვინის საერთაშორისო კონკურსის ,,ვინექსპო ბორდო 2017“-ს (Vinexpo Bordeaux 2017) გახსნას დაესწრო.

როგორც სოფლის მეურნეობის სამინისტროდან იუწყებიან, Vinexpo Bordeaux ღვინის ინდუსტრიაში წლის უმნიშვნელოვანესი მოვლენაა და მონაწილე ქვეყნების, წარმოდგენილი ღვინოებისა და ვიზიტორების რაოდენობის მიხედვით ერთ-ერთი ყველაზე მასშტაბურია მსოფლიოში. ბორდოს გამოფენაზე თავს იყრიან ღვინის წამყვანი სპეციალისტები, ბაიერები და იმპორტიორები.

როგორც სოფლის მეურნეობის მინისტრმა ლევან დავითაშვილმა განაცხადა, საქართველო უკვე მეორედ იღებს მონაწილებას გამოფენაში ,,ვინექსპო ბორდო“ და ძალიან მნიშვნელოვანია ამ პლატფორმის მაქსიმალურად ეფექტიანად გამოყენება.

,,ეს არის ადგილი, სადაც თავს იყრიან ღვინის პროფესიონალები, სპეციალისტები და იმპორტიორები მსოფლიოს სხვადასხვა ქვეყნიდან. შესაბამისად, ქართველ მწარმოებლებს შესაძლებლობა ეძლევათ პირდაპირი სავაჭრო ურთიერთობები დაამყარონ, როგორც იმპორტიორებთან, ასევე დისტრიბუტორებთან. წელს, გამოფენაში საქართველოს მონაწილეობას განსაკუთრებული მნიშვნელობა ენიჭება, რადგან ბორდოში, ღვინის ცივილიზაციის ცენტრში მიმდინარე წლის ივლისიდან ნოემბრის ჩათვლით საქართველო, სპეციალური სტუმრის სტატუსით, მასშტაბურ ექსპოზიციას წარმოადგენს. ეს არის შანსი ქართული ღვინის და ზოგადად, საქართველოს შესახებ ცნობადობის გაზრდის და პოპულარიზაციისთვის“, - განაცხადა ლევან დავითაშვილმა.

ღვინის ეროვნული სააგენტოს მხარდაჭერით, წელს გამოფენაზე საკუთარი პროდუქცია წარმოედგენილი აქვს ქართული ღვინის მწარმოებელ 24 კომპანიას: „თბილღვინო“, „შატო მუხრანი“, „GWS“, „ასკანელი ძმები“, „ბადაგონი“, „კორპორაცია ქართული ღვინო“, „მეღვინეობა დანიელი“, „დუგლაძეების ღვინის კომპანია“, „მეგობრების მარანი“, „გიუაანი“, „გრუზვინპრომი“, „KTW“, „მეღვინეობა ხარება“, „ქინძმარაულის მარანი“, „კახური ღვინის მარანი“, „მარანული“, „ქიმერიონი“, „შილდა“, „შუმი“, „თელავის ღვინის მარანი“, „ვაზიანი კომპანი“, „ვაინმენი“, „კორპორაცია ქინძმარაული“ და „ბრუალე“.

როგორც საქართველოს ელჩმა საფრანგეთში ეკატერინე სირაძე-დელონემ განაცხადა, საქართველო უკვე მეორედ მონაწილეობს მსოფლიოს მასშტაბით ღვინის მიმართულების ერთ-ერთ ყველაზე პრესტიჟულ გამოფენაში ,,ვინექსპო ბორდო“.

ლევან დავითაშვილი გამოფენის ფარგლებში გამართულ ქართული ღვინის დეგუსტაციას „საქართველო - ღვინის სამშობლო“ დაესწრო, რომელსაც ღვინის ეროვნული სააგენტოს თავმჯდომარე გიორგი სამანიშვილი და სადეგუსატაციო კომისიის თავმჯდომარე, OIV-ს კომისიის ვიცე-პრეზიდენტი ანა გოდაბრელიძე უძღვებოდნენ.

დეგუსტაცია-პრეზენტაციაზე წარმოდგენილი იყო შემდეგი ღვინოები: “მწვანე” (თელავის ღვინის მარანი), “Grand Reserve” (GWS), “მანავი” (კახური ღვინის მარანი), “ხვანჭკარა” (მეღვინეობა ხარება), “ქისი” (თბილღვინო), “რქაწითელი” (დურუჯის ველი), “საფერავი” (შატო მუხრანი) და “შავკაპიტო” (შატო მუხრანი).

ბორდოს გამოფენის ფარგლებში გამართულ კონკურსზე Citadelles Du Vin ოთხმა ქართულმა ღვინომ მიიღო სხვადასხვა დასახელების ჯილდო - უმაღლესი ჯილდო ტროფი ღვინო „ხარება 2012“ (კომპანია „მეღვინეობა ხარებას“), ოქროს მედალი - მაყაშვილის ღვინის მარანის „კაბერნე 2015“ (კომპანია “ვაზიანი კომპანი”) , ვერცხლის მედალი - „ქინძმარაული 2013“ (კომპანია „კახური ღვინის მარანი”) და „ჭაჭა“ (კომპანია „შუმი”).

გამოფენის ფარგლებში გამართულ ღონისძიებებს საქართველოს ელჩი საფრანგეთში ეკატერინე სირაძე-დელონე, ღვინის ეროვნული სააგენტოს თავმჯდომარე გიორგი სამანიშვილი, ასოციაციის „ქართული ღვინო“ აღმასრულებელი დირექტორი თინა კეზელი და საქართველოს ტურიზმის ეროვნული ადმინისტრაციის ხელმძღვანელი გიორგი ჩოგოვაძე ესწრებოდნენ.

ღვინისა და ალკოჰოლური სასმელების საერთაშორისო გამოფენა Vinexpo Bordeaux 2017 საფრანგეთის ქალაქ ბორდოში 18-21 ივნისს იმართება. გამოფენა Vinexpo Bordeaux 1981 წელს ბორდოს სავაჭრო-სამრეწველო პალატის მიერ დაარსდა და ორ წელიწადში ერთხელ იმართება.