დიმიტრი ქუმსიშვილი - გვინდა, რაც შეიძლება დაბალი განაკვეთები იყოს კომერციული ბანკებისგან და ამისთვის ძალიან ბევრი რამ კეთდება

გვინდა, რაც შეიძლება დაბალი განაკვეთები იყოს კომერციული ბანკებისგან და ამისთვის ძალიან ბევრი რამ კეთდება, – ამის შესახებ პირველმა ვიცე–პრემიერმა, ფინანსთა მინისტრმა დიმიტრი ქუმსიშვილმა “პალიტრანიუსის“ გადაცემა „360 გრადუსის“ ეთერში განაცხადა.

ვიცე–პრემიერი მიიჩნევს, რომ ლარიზაციის პროგრამამ ერთმნიშვნელოვნად გაამართლა.

„ლარიზაციის პროექტი და პროგრამა არის კომპლექსური და მასშტაბური პროექტი, რომლის ჰორიზონტს ვუყურებთ 7–დან 8 წლამდე. შესაბამისად, ნაბიჯები, რომელიც გვაქვს შეთანხმებული, მათ შორის ეროვნულ ბანკთან, კომპლექსურად გულისხმობს იმას, რომ მაქსიმალურად მოხდეს მოსახლეობის დაკრედიტება ლარში და მაქსიმალურად მოხდეს ლარის წყაროების გაჩენა. 25%, რომელმაც ისარგებლა აღნიშნული შეთავაზებით მთავრობისგან, არის ძალიან დიდი წარმატება, რადგან ეს არ ყოფილა ძალდატანებული პროგრამა. ეს იყო შეთავაზება, რომლითაც მოსახლეობის გარკვეულმა კატეგორიამ ისარგებლა. მთავრობის ამოცანა არის მოსახლეობაზე ზრუნვა და ყველაფერი უნდა გააკეთოს, რომ მოსახლეობას გარკვეული ტვირთები შეუმსუბუქოს. მიდიოდა დეტალური მონიტორინგი ბანკებში, იყო გარკვეული შეფერხებები, თუმცა, ის, რომ ამდენმა ადამიანმა ისარგებლა ამით და საბოლოოდ 78,6 მილიონი დოლარის სესხები გავალარეთ, ეს არის ძალიან მიშვნელოვანი წინ გადადგმული ნაბიჯი. ეს იყო ერთჯერადი ნაბიჯები, არაერთჯერადებს რაც შეეხება, ჩვენ ამავე დროს ვდგამთ თანმიმდევრულ ნაბიჯებს. ჩვენ ვთქვით, რომ მოსახლეობას სესხი უნდა მიეცეს ლარში, ანუ თუ მოსახლეობა აიღებს 40 ათას დოლარის ექვივალენტის სესხს ლარში, მან სესხი უნდა აიღოს ლარში“, – განაცხადა დიმიტრი ქუმსიშვილმა.

ჟურნალისტის რეპლიკაზე, თუ რას იტყოდა ქუმსიშვილი იმაზე, რომ ლარში სესხებზე პროცენტი ძალიან მაღალია, პირველმა ვიცე–პრემიერმა აღნიშნა, რომ „ახლაც და რეალურ დროშიც, რა თქმა უნდა, ყველაფერი არის დამოკიდებული მსესხებელზე, მსესხებლის ისტორიაზე და ა.შ.“

„რა თქმა უნდა, ჩვენ ჩვენი მოსახლეობისთვის გვინდა, რაც შეიძლება დაბალი განაკვეთები იყოს კომერციული ბანკებისგან და ამისთვის ძალიან ბევრი რამ კეთდება. მათ შორის ის, რომ ლიკვიდური ლარი, რომელსაც ეროვნული ბანკი ბანკებს აძლევს, არის კომერციულ ბანკებს, რეფინანსირებას +1%, ამის ფარგლებში მერყეობს და ეს ყველაფერზე მეტყველებს. დროთა განმავლობაში ეს პროცენტი დაიწევს აუცილებლად, რადგან ლიკვიდობა იზრდება ბანკებში და დამატებით ჩვენს მიერ განხორციელებული ფისკალური რეფორმა ამ ყველაფერზე აისახება“, – განაცხადა მინისტრმა.