,,ჯორჯიან უოთერ ენდ ფაუერმა” „გალტ & თაგარტთან” ერთად საქართველოს ბაზარზე 40 მლნ ლარის ობლიგაციები განათავსა
“ჯორჯიან უოთერ ენდ ფაუერმა”, საქართველოს ბაზარზე კომუნალური მომსახურების სფეროს ორგანიზაციისთვის, უპრეცენდენტო მოცულობის, 40 მლნ ლარის ობლიგაციების კერძო განთავსება წარმატებით განახორციელა , - ამის შესახებ ”ჯორჯიან უოთერ ენდ ფაუერიდან” იუწყებიან.
მათივე ინფორმაციით, ლარში ნომინირებული 6-თვიანი ობლიგაციებით მიღებული თანხა კაპიტალურ საინვესტიციო პროექტებს მოხმარდება. აღნიშნული ფასიანი ქაღალდების წლიური სარგებელი ეროვნული ბანკის რეფინანსირების განაკვეთს დამატებული 4%-ია. ”ჯორჯიან უოთერ ენდ ფაუერის” მიერ გამოცემული ობლიგაციები კომპანია „გალტ & თაგარტმა” განათავსა.
”ჯორჯიან უოთერ ენდ ფაუერის” გენერალური დირექტორის, გიორგი ცხადაძის განცხადებით, დამატებითი 40 მილიონი ლარის რესურსი წყალმომარაგების ინფრასტრუქტურის განახლება-განვითარებას და ენერგეტიკული პროექტების განხორციელებას მოხმარდება.
"წარმატებით ვაგრძელებთ საფინანსო ინსტიტუტებთან თანამშრომლობას. ეს არის ობლიგაციების მეოთხე ემისია. დამატებითი 40 მილიონი ლარის რესურსი წყალმომარაგების ინფრასტრუქტურის განახლება-განვითარებას და ენერგეტიკული პროექტების განხორციელებას მოხმარდება, რაც უაღრესად მნიშვნელოვანია, როგორც კომპანიის, ასევე წყალმომარაგების სექტორის განვითარებისთვის", - განაცხადა გიორგი ცხადაძემ.
როგორც „გალტ & თაგარტის“ მმართველმა დირექტორმა ოთარ შარიქაძემ აღნიშნა, „გალტ & თაგარტის“ მეშვეობით უკვე მეოთხედ მოხდა ”ჯორჯიან უოთერ ენდ ფაუერის” ობლიგაციების წარმატებით განთავსება და ყველა განთავსება განხორციელდა ეროვნულ ვალუტაში.
„მოხარული ვარ, რომ „გალტ & თაგარტის“ მეშვეობით უკვე მეოთხედ მოხდა ”ჯორჯიან უოთერ ენდ ფაუერის” ობლიგაციების წარმატებით განთავსება. მნიშვნელოვანია, რომ ყველა განთავსება განხორციელდა ეროვნულ ვალუტაში. ამ მხრივ GWP მნიშვნელოვან როლს ასრულებს საქართველოს კაპიტალის ბაზრის ჩამოყალიბებაში. ამ დროისთვის, „გალტ & თაგარტი“, საკუთარი პროფესიონალთა გუნდისა და გამოცდილების წყალობით, გახდა საინვესტიციო საბანკო მომსახურების მიმწოდებელი წამყვანი კომპანია ქვეყანაში. მსურს მადლობა გადავუხადო ყველას, ვინც იმუშავა აღნიშნულ გარიგებაზე და წარმატება ვუსურვო კომპანია GWP-ის“, - განაცხადა „გალტ & თაგარტის“ მმართველმა დირექტორმა ოთარ შარიქაძემ.
GWP ფასიანი ქაღალდების ემისიას უკვე მეოთხედ ახორციელებს. პირველად 2.6 მლნ ლარის ობლიგაციები კომპანიამ 2015 წლის აგვისტოში გამოუშვა. იმავე წლის 10 დეკემბერს, ”ჯორჯიან უოთერ ენდ ფაუერმა” 6 მლნ ლარის, ხოლო მესამედ, 2016 წლის 7 დეკემბერს 30 მლნ ლარის ობლიგაციები განათავსა.