პროექტის „აწარმოე საქართველოში“ ფარგლებში კიდევ ერთი საწარმო დაფინანსდა

საქართველოს ეკონომიკისა და მდგრადი განვითარების სამინისტროს სსიპ-ის „აწარმოე საქართველოში“ ფარგლებში, ინდუსტრიული მიმართულებით 191 პროექტია მხარდაჭერილი, რომელთა რიცხვს კიდევ ერთი კომპანია, შპს „ბენნ“ შეემატება.

როგორც „აწარმოე საქართველოში“ აცხადებენ, ტანსაცმლის ინდუსტრიაში მოღვაწე კომპანია, პროექტის ფარგლებში გაფართოებას გეგმავს. საწარმო ახალი დანადგარებით აღიჭურვება, სადაც სინთეტიკური ბოჭკოს შიგთავსის მქონე საბნები და ბალიშები შეიკერება. კომპანიაში ამჟამად 50-მდე ადამიანი მუშაობს, ახალი საწარმოს ამოქმედების შემდეგ დასაქმებულთა რაოდენობა 15 ადამიანით გაიზრდება. კომპანია, რომელიც ყოველდღიურად 200 კილო სინთიპონის დამუშავებას აპირებს, სამომავლოდ საკუთარ პროდუქციას ექსპორტზე გაიტანს.

„ბენნ“ თბილისში, ორხევში მდებარეობს და პროგრამის „აწარმოე საქართველოში“ ფარგლებში ფინანსური მხარდაჭერით სარგებლობს, რაც პირველი 2 წლის განმავლობაში პროცენტის თანადაფინანსებას გულისხმობს. სსიპ-ის „აწარმოე საქართველოში“ დახმარებით განხორციელებული პროექტის ინვესტიციის ჯამური მოცულობა 600 000 ლარს შეადგენს.