რა შეცდომებს უშვებენ ფართის გამქირავებლები და რა უნდა გაითვალისწინოთ ხელშეკრულების გაფორმებისას
კომერციული ფართის გაქირავების ან იჯარით გაცემისას ბევრი მნიშვნელოვანი დეტალია გასათვალისწინებელი. წინააღმდეგ შემთხვევაში, შესაძლოა სარგებლის ნაცვლად ფინანსური ზარალი მიიღოთ.
როგორც ჩვენმა რესპონდენტმა ლევან ლიპარტელიანმა „ბიზნესპრესნიუსთან“ საუბრისასა განაცხადა, აღმაშენებელზე კუთვნილი ფართი გააქირავა, თუმცა დამქირვებლის მხრიდან მთელი რიგი პრობლემები შეექმნა.
„აღმაშენებლის გამზირზე ჩემი კუთვნილი ფართი უცხოელზე გავაქირავე ხელშეკრულებით. დამქირავებელმა ფარშთი რესტორანი გახსნა. თუმცა, როგორც ჩანს, ბიზნესი ვერ ააწყო და ქირას არ იხდის. გარდა ამისა, ჩემთან შეთანხმების გარეშე გააკეთა შიდა რემონტი, ასევე გარე და შიდა რეკონსტრუქცია. ამის გამო მეზობელს ზიანი მიაყენა, ზარალის ანაზღაურება კი მე მომიწია. ამას ისიც დაემატა, რომ ჩემს მდგმურს მერიიდან რეკონსტრუქციის გაკეთების ნებართვა არ ჰქონდა აღებული, ამიტომ მერიამ მე დამაჯარიმა. მერიასთან პრეტენზიები არ მაქვს, რადგან კანონით მოქმედებენ, თუმცა დაზარალებული მე აღმოვჩნდი. თვითნებურად ახორციელებს ყველა საქმეს და საქართველოში მოქმედ კანონს პატივს არ სცემს. მსგავსი პრობლემები რამდენიმე ჩემს მეზობელსაც აქვს“, - განაცხადა დაზარალებულმა.
ადვოკატმა ირაკლი უტიაშვილმა „ბიზნესპრესნიუსთან“ საუბრისას იმ შეცდომებზე ისაუბრა, რომელსაც ფართის გაქირავებისას ყველაზე ხშირად უშვებენ.
„გამქირავებელმა ან მეიჯარემ ხელშეკრულების გაფორმების დროს უნდა გაითვალისწინოს ის სამართლებრივი შედეგები, რაც მოიჯარის მხრიდან ხელშეკრულების დარღვევას შეიძლება მოჰყვეს.
კონკრეტულ შემთხვევაში, თუ დამქირავებელმა ფართის რეკონსტრუქცია მერიიდან შესაბამისი ნებართვის გარეშე გააკეთა, ხელშეკრულებაში უნდა იყოს ისეთი პუნქტები გათვალისწინებული, სადაც ზიანის ანაზღაურება იქნება მოთხოვნილი, ეს შეიძლება იყოს კონკრეტული თანხა ან ზარალის შესაბამისი. თუმცა მიუხედავად იმისა, ეს ხელშეკრულებაში გათვალისწინებული იქნება თუ არა, გამქირავებელს უფლება აქვს დამქირავებლისგან ზიანის ანაზღაურება მაინც მოითხოვოს“, - განაცხადა უტიაშვილმა.
მისი თქმით, ზოგადი კანონის მიხედვით, დამქირავებელს გამქირავებელთან შეთანხმების გარეშე რეკონსტრუქციისა და რემონტის ჩატარების უფლება არ აქვს, მით უმეტეს, როდესაც ეს გარკვეულ ნებართვასთან და თანხმობასთან არის დაკავშირებული.
„თუ ეს საკითხი ხელშეკრულებაში იქნება მითითებული, მეიჯარის ან გამქირავებლის ინტერესები უფრო კარგად იქნება დაცული.
რაც შეეხება სხვა შეცდომებს, ყველაზე ხშირად ზიანის ანაზღაურების პირობები არ არის ხოლმე გათვალისწინებული. მაგალითად, მიმდინარეობს დავა, მიმდინარე რემონტი ვინ უნდა გააკეთოს, ხარჯი ვინ უნდა გაწიოს. ქონებების დაზიანების შემთხვევაში სტიქიის გამო, ვინ უნდა აღადგინოს და ა.შ. ხელშეკრულების გაფორმების დროს ამ საკითხებზე არ ფიქრობენ.
მაგალითად, დამქირავებელს ან მოიჯარეს ფართი 2 წლით აქვს აღებული. ხშირად თუ საქმე კარგად ვერ წავიდა, დამქირავებელი უფრო მეტ თანხად სხვაზე აქირავებს და სხვაობას თავად იღებს. ასეთი დეტელები ხშირად ხელშეკრულებაში არ არის ხოლმე გათვალისწინებული“, - განაცხადა უტიაშვილმა.
ლიკა ამირაშვილი