ავიაციის გამოყენებით 300 ჰექტარზე მეტი ფართობი და სიმინდის ნათესები დამუშავდა
აზიური ფაროსანას საწინააღმდეგო, შეწამვლითი სამუშაოები ავიაციის მეშვეობით აბაშის მუნიციპალიტეტის შემდეგ, ხობის მუნიციპალიტეტში სოფელ ჭალადიდში მიმდინარეობს.
როგორც სოფლის მეურნეობის სამინისტროში აცხადებენ, საავიაციო წამლობა ეტაპობრივად ჩატარდება იმ ტერიტორიებზე, სადაც შესაძლებელია მისი გამოყენება. სურსათის ეროვნული სააგენტო აზიური ფაროსანას საწინააღმდეგო ღონისძიებებს აგრძელებს. დღეისათვის დამუშავებული ფართობების რაოდენობა დაახლოებით 90 ათას ჰექტარს შეადგენს.
პარალელურად გრძელდება შეწამვლითი ღონისძიებები სოფლის მეურნეობის სამინისტროს და სურსათის ეროვნული სააგენტოს სპეციალური ტექნიკით - სამანქანე აგრეგატებით და სატრაქტორო დანადგარებით. ერთი კვირის განმავლობაში სამეგრელოს, გურიის და იმერეთის რეგიონებში 10 ათას ჰექტარზე მეტი ფართობი შეიწამლა.
სამინისტროს განცხადებით, საავიაციო შეწამვლითი სამუშაოები დადგენილი წესების სრული დაცვით ტარდება. ავიაციით შეწამვლითი სამუშაოების განხორცილებისას, აუცილებელია უსაფრთხოების შესაბამისი ზომების დაცვა, რის შესახებაც ადგილობრივი მუნიციპალიტეტების მეშვეობით მოსახლეობა წინასწარ იქნება ინფორმირებული.
„აზიური ფაროსანას საწინააღმდეგო ღონისძიებები უცხოელი ექსპერტების ჩართულობით მომზადებული სტრატეგიის შესაბამისად ხორციელდება. სტრატეგიის სამოქმედო გეგმის თანახმად, სოფლის მეურნეობის სამინისტროს სურსათის ეროვნული სააგენტო ქიმიურ წამლობას საკარმიდამო ნაკვეთებსა და დასახლებული პუნქტების მიმდებარედ არსებულ ნარგავებში ივნისიდან ატარებს. მას შემდეგ, რაც მავნებლის გავრცელება ისეთ დიდ მასივებში აღინიშნა, სადაც შესაძლებელია საავიაციო წამლობის ჩატჩატარება, ღონისძიებებში ავიაცია ჩაერთო“, – განაცხადეს სამინისტროში.