სამეგრელოში, გურიასა და იმერეთში აზიური ფაროსანას წინააღმდეგ ავიაცია ჩაერთო

სოფლის მეურნეობის სამინისტროს ინფორმაციით, აზიური ფაროსანას საწინააღმდეგო წამლობა, ავიაციის გამოყენებით, სამეგრელოსა და გურიის რეგიონებში მიმდინარეობს.

უწყების ცნობით, სამეგრელოს რეგიონში, აბაშისა და ხობის მუნიციპალიტეტებში 1 000 ჰექტარი ფართობია დამუშავებული.

”საავიაციო წამლობა იწყება გურიის რეგიონშიც. ავიაციის მეშვეობით ოზურგეთის და ლანჩხუთის მუნიციპალიტეტებში 5 ათასამდე ჰექტარი საყანე ფართობის და დიდი მასივების შეწამვლაა დაგეგმილი. ავიაციის პარალელურად, თერმული ნისლის ტექნოლოგიით, სამანქანე და სატრაქტორე აგრეგატებით მავნებლის საწინააღმდეგოდ იწამლება ის ფართობები, სადაც ავიაციის გამოყენება შეუძლებელია. დასავლეთ საქართველოში მობილიზებული სოფლის მეურნეობის სამინისტროსა და სურსათის ეროვნული სააგენტოს სპეციალური ტექნიკით ღონისძიებები მიმდინარეობს სამეგრელოს (აბაშის, ხობის, ზუგდიდის, წალენჯიხის, მარტვილის, სენაკის მუნიციპალიტეტები), გურიის (ლანჩხუთის, ოზურგეთის, ჩოხატაურის მუნიციპალიტეტები) და იმერეთის (სამტრედიის, ხონის მუნიციპალიტეტები) რეგიონებში”, - აცხადებენ სოფლის მეურნეობის სამინისტროში.

მათივე ინფორმაციით, დღევანდელი მდგომარეობით, მავნებლის საწინააღმდეგოდ 90 ათას ჰექტარზე მეტი ფართობია დამუშავებული.

აზიური ფაროსანას საწინააღმდეგო ღონისძიებები ავიაციის გამოყენებით 13 სექტემბრიდან მიმდინარეობს. საავიაციო შეწამვლითი სამუშაოები დადგენილი წესების სრული დაცვით ტარდება.