გიორგი კვირიკაშვილი - ჩვენ ავიაკომპანიებს ვთავაზობთ მაღალი სტანდარტის მომსახურებას და ვატარებთ სწორ მარკეტინგულ პოლიტიკას
ჩვენ ავიაკომპანიებს ვთავაზობთ მაღალი სტანდარტის მომსახურებას და ვატარებთ სწორ მარკეტინგულ პოლიტიკას, რაც პირდაპირ პროპორციულად აისახება ჩვენს შედეგებზე , - ამის შესახებ საქართველოს პემიერ-მინისტრმა გიორგი კვირიკაშვილმა თბილისის საერთაშორისო აეროპორტში განაცხადა, სადაც ახალი მოფრენის ტერმინალი გახსნა.
კვირიკაშვილი სიტყვით გამოსვლისას მიესალმა დამსწრე სტუმრებს და მათ შორის დიპლომატიური კორპუსის წარმომადგენლებს.
"დღეს ოფიციალურად იხსნება და ექსპლუატაციაში შედის თბილისის საერთაშორისო აეროპორტის ახალი ტერმინალი. დასრულებულია საოპერაციო მზაობისა და ტერმინალების შერწყმის პროცესი და როგორც ხედავთ ტერმინალი ოპერირების პროცესშია. ამ პროექტის განხორციელებით თბილისის საერთაშორისო აეროპორტი ამიერიდან წელიწადში 4 მილიონი მგზავრის მომსახურებას შეძლებს. დაახლოებით ერთი წლის წინ ჩაეყარა საფუძველი მოფრენის ახალი ტერმინალის მშენებლობას. მშენებლობა დაგეგმილზე ადრე დაიწყო იმის გამო, რომ მნიშვნელოვნად გაიზარდა მგზავრთა ნაკადი და შეიძლება ითქვას, რომ ზრდის სისწრაფემ ყველანაირ მოლოდინს გადააჭარბა", - განაცხადა პრემიერმა.
მისივე თქმით, ავიაციის განვითარება ყოველთვის იყო და არის ერთ-ერთი მთავარი პრიორიტეტი.
"სწორედ ავიაბაზრის განვითარება, აეროპორტებისა და სანავიგაციო ინფრასტრუქტურის განვითარება, მგზავრთა ნაკადის ზრდა და ფრენების ახალი მიმართულებების დამატება გახლავთ ქვეყანაში ტურიზმის განვითარების წინაპირობა. ეს კი, რა თქმა უნდა, პირდაპირ უკავშირდება ჩვენი ქვეყნის ეკონომიკურ განვითარებას და ჩვენი ხალხის ცხოვრების დონის მნიშვნელოვან გაუმჯობესებას. თანამიმდევრული და კოორდინირებული მუშაობით ჩვენ უკვე შეგვიძლია საქართველოს სწორი პოზიციონირება მსოფლიოს საავიაციო ბაზარზე. ჩვენ ავიაკომპანიებს ვთავაზობთ მაღალი სტანდარტის მომსახურებას და ვატარებთ სწორ მარკეტინგულ პოლიტიკას, რაც პირდაპირ პროპორციულად აისახება ჩვენს შედეგებზე", - აღნიშნა მთავრობის მეთაურმა.