გასულ წელს საქართველოში ყველაზე მაღალანაზღაურებადი საქმიანობა მშენებლობა იყო. „საქსტატის“ ცნობით, ამ სფეროში დაქირავებით დასაქმებულთა საშუალო თვიური ანაზღაურება 1290,7 ლარი იყო.
ამასთან, მაღალანზღაურებადი საქმიანობების ხუთეულში იყო: ელექტროენერგიის, აირისა და წყლის წარმოება და განაწილება - 1 204,1 ლარი; ტრანსპორტი და კავშირგაბმულობა - 1 200,3; ოპერაციები უძრავი ქონებით, იჯარა და მომხმარებლისათვის მომსახურების გაწევა - 1151,9; სამთომოპოვებითი მრეწველობა - 1143,0 ლარი.
გასული წლის ყველაზე დაბალანაზღაურებადი საქმიანობების ჩამონათვალი კი ასე გამოიყურება: სოფლის მეურნეობა, ნადირობა და სატყეო მეურნეობა - 574,2 ლარი; განათლება - 619,3; სასტუმროები და რესტორნები - 626,6 ლარი; თევზჭერა, მეთევზეობა - 654,0; დამამუშავებელი მრეწველობა - 773,4 ლარი.
რაც შეეხება სხვა საქმიანობებს, ვაჭრობა; ავტომობილების, საყოფაცხოვრებო ნაწარმისა და პირადი მოხმარების საგნების რემონტი - ამ სფეროში დასაქმებულთა საშუალო თვიური ანაზღაურება 790,3 ლარია; ჯანმრთელობის დაცვა და სოციალური დახმარება - 899,2 ლარი და კომუნალური, სოციალური და პერსონალური მომსახურების გაწევა - 940,9 ლარი.