საუდის არაბეთმა გამოთქვა ინტერესი, "დელტას" წარმოებული ტექნიკის ექსპორტის მიმართულებით საქართველოსთან აქტიური თანამშრომლობა განაგრძოს
საქართველოს პრემიერ-მინისტრი გიორგი კვირიკაშვილი თავდაცვისა და უსაფრთხოების კონფერენციის ფარგლებში საუდის არაბეთის შეიარაღებული ძალების გენერალური შტაბის უფროსს, გენერალ აბდულ რაჰმან ბინ სალეჰი ალ-ბანიანს შეხვდა.
როგორც მთავრობის ადმინისტრაციის პრესსამსახური იუწყება, შეხვედრაზე საუბრისას აღინიშნა ბოლო წლებში საქართველოსა და საუდის არაბეთს შორის არსებული ურთიერთობების გააქტიურება.
ხაზი გაესვა თავდაცვისა და უსაფრთხოების სფეროში თანამშრომლობის გაღრმავების მნიშვნელობას.
საუდის არაბეთმა ასევე გამოთქვა ინტერესი, განაგრძოს საქართველოსთან აქტიური თანამშრომლობა "დელტას" მიერ წარმოებული ტექნიკის ექსპორტის მიმართულებით.
მთავრობის ადმინისტრაციის ცნობით, შეხვედრაზე მხარეებმა განიხილეს რეგიონისა და გლობალური უსაფრთხოების საკითხები.
საქართველოს მთავრობის მეთაურმა საუდის არაბეთის დელეგაციას კონფერენციაში მონაწილეობისთვის მადლობა გადაუხადა.
გენერალმა აბდულ რაჰმან ბინ სალეჰი ალ-ბანიანმა გიორგი კვირიკაშვილს საუდის არაბეთის პრინცისგან მოკითხვა გადასცა.