განათლების სამინისტრო - საქართველოში სწავლის მსურველ უცხოელთა რიცხვი 50%-ით გაიზარდა
მიმდინარე წელს პირველად, საქართველოს უნივერსიტეტები რამდენიმე საერთაშორისო გამოფენასა თუ კონფერენციაზე წარსდგნენ პროექტით „ვისწავლოთ საქართველოში, - ამის შესახებ განათლებისა და მეცნიერების სამინისტრო იუწყება.
პროექტი საქართველოს განათლებისა და მეცნიერების სამინისტროს ინიცირებულია და მიზნად ისახავს საქართველოს, როგორც საგანმანათლებლო ჰაბის პოპულარიზებას და უცხოელი სტუდენტების მოზიდვას.
პროექტის ფარგლებში, საქართველოს სახელმწიფო და კერძო უმაღლესი სასწავლებლები, მსოფლიოს წამყვანი და ცნობილი უმაღლესი დაწესებულებების მსგავსად, დაინტერესებულ უცხოელ მოქალაქეებს თავიანთ უცხოენოვან საერთაშორისო საგანმანათლებლო პროგრამებსა და საქართველოში სწავლის პირობებს აცნობენ.
”პროექტის საწყის ეტაპზე, საერთაშორისო საგანმანათლებლო ბაზარზე საქართველო, როგორც ქვეყანა, ბევრი უცხოელისთვის აღმოჩენა იყო. დღეს უკვე საგრძნობლადაა გაზრდილი საქართველოს და მისი საგანმანათლებლო სისტემის ცნობადობა. გამოფენებში საქართველოს უნივერსიტეტების მონაწილეობამ ნათლად აჩვენა, რომ აუცილებელია ანალოგიურ საერთაშორისო საგანმანათლებლო ღონისძიებებში ჩართვა, ეს არის საუკეთესო საშუალება უცხოელი სტუდენტებისა და უცხოური ინვესტიციების მოზიდვის.
პროექტის ფარგლებში, ქართულმა უნივერსიტეტებმა, ხუთ საერთაშორისო გამოფენაში მიიღეს მონაწილეობა. ყოველ მორიგ კონფერენციაში მონაწილეობით საქართველო ახალ საგანმანათლებლო ბაზარზე გადის, მეტი უცხოელი პოტენციური სტუდენტი ინტერესდება საქართველოში სწავლით და შესაბამისად, მათი მომართვიანობის მაჩვენებელი წინა წელთან შედარებით, 50%-ითაა გაზრდილი, ასევე გაიზარდა ქართულ უნივერსიტეტებთან თანამშრომლობით დაინტერესებულ აგენტთა რიცხვი და საქართველოს უნივერსიტეტები უკვე აგენტების გამაერთიანებელ მსოფლიო მნიშვნელობის კომპანიებთან თანამშრომლობენ. საგარეო საქმეთა სამინისტროსთან მჭიდრო თანამშრომლობით, სამუშაოები მიმდინარეობს ჩამოსული სტუდენტებისთვის შესაბამისი გარემოს უზრუნველყოფისა და სავიზო პროცედურების გამარტივების მიზნით”, - აღნიშნულია ინფორმაციაში.
განათლების სამინისტროს ინფორმაციით, საქართველოში ყველა ეროვნებისა და ქვეყნის ადამიანი თავს დაცულად გრძნობს და გამომდინარე იქიდან, რომ ჩვენი ქვეყანა ბოლონიის პროცესში ჩართულ ევროპის 47 ქვეყანას შორის ერთ-ერთია, აქ მიღებული განათლებით, უცხოელი კურსდამთავრებულები ევროპაში კარიერას წარმატებით აგრძელებენ.