კობა გვენეტაძე - როცა შევიძინეთ ვალუტა, ეს არავითარ შემთხვევაში არ ნიშნავდა იმას, რომ მას აუცილებლად გავყიდდით
როცა შევიძინეთ ვალუტა, ეს არავითარ შემთხვევაში არ ნიშნავდა იმას, რომ ჩვენ მას აუცილებლად გავყიდდით , - ამის შესახებ ეროვნული ბანკის პრეზიდენტმა კობა გვენეტაძემ საფინანსო-საბიუჯეტო კომიტეტის სხდომაზე განაცხადა. მისი თქმით, ბევრმა სხვა ქვეყანამ რყევებზე ძალიან ხშირი რეაგირება მოახდინეს და ამან კონტრპროდუქტიული შედეგი გამოიღო.
“როცა გავაკეთეთ ინტერვენციები და შევიძინეთ ვალუტა, ეს არავითარ შემთხვევაში არ ნიშნავდა პროპორციულად იმას, რომ ჩვენ მას აუცილებლად გავყიდდით. ჩვენ ვუყურებთ სიტუაციას, როდესაც არის გადაჭარბებული რყევები და ამის ერთ-ერთი მაგალითი იყო შარშან, როცა მოხდა დიდი ტრანზაქცია და იყო შესაძლებელი, რომ ამ ტრანზაქციას გავლენა მოხედინა, მაშინ გამოვიყენეთ კიდეც ეს და გავყიდეთ კიდეც სავალუტო რეზერვები. ყოველ წუთში რეაგირება ამასთან დაკავშირებით ბევრმა სხვა ქვეყანამ გააკეთა, თუმცა მათ ცოტა ხანში დაინახეს, რომ ეს აბსოლუტურად კონტრპროდუქტიული იყო. როცა სავალუტო ბაზრის განვითარება ხდება ქვეყანაში, ამას მოლოდინების ეფექტის გაძლიერებაც მოყვება, მაგრამ ამავე დროს იგივე ბაზრის მოთამაშეები, ანუ ეკონომიკური სუბიექტები უფრო და უფრო ნათლად ხედავენ, რომ დაზღვევის მექნიზმები არის საჭირო და ა.შ.
ვფიქრობთ, რომ ამ შემთხვევაში არ იყო საჭირო ინტერვენცია. თუ ჩავთვლით, რომ ეს გასაკეთებელი იქნება, ასეც მოვიქცევით, როგორც ეს გავაკეთეთ 2016 წელს“, - აღნიშნა ეროვნული ბანკის პრეზიდენტმა.