კვებისა და სარეალიზაციო ობიექტებში ცხენის და ვირის ხორცის უკანონო რეალიზაციის შემთხვევები გამოვლინდა
სურსათის ეროვნულმა სააგენტომ ცხენის და ვირის ხორცის უკანონო რეალიზაციის შემთხვევები გამოავლინა. როგორც სურსათის ეროვნული სააგენტოში აცხადებენ, ცხენის და ვირის ხორცი საზოგადოებრივი კვების და სარეალიზაციო ობიექტებიდან აღებული მზა კერძების და სხვა სახის სურსათის ნიმუშებში აღმოაჩინეს.
სეს-ის ინფორმაციით, გამოვლენილი დარღვევების გამო ბიზნესოპერატორები დაჯარიმდნენ.
”სააგენტო ხორცის სახეობრივ კვლევას 2017 წლის მარტიდან ატარებს. საზოგადოებრივი კვების და სარეალიზაციო ობიექტებიდან აღებულია მზა კერძების და სხვა სახის სურსათის 90 ნიმუში, რომლებიც აკრედიტებულ ლაბორატორიაში შემოწმებულია ცხენის და ვირის ხორცის იდენტიფიცირებაზე.
კვლევის შედეგად გამოვლინდა 12 დარღვევა, კერძოდ, სურსათის ეტიკეტზე მითითებული იყო საქონლის ან ღორის ხორცი და შემადგენლობაში აღმოჩნდა ცხენის, ხოლო ერთ შემთხვევაში - ვირის ხორცი. გამოვლენილი დარღვევების გამო ბიზნესოპერატორები დაჯარიმდნენ. მათ საეჭვოდ მიჩნეული სურსათის ბაზრიდან გამოთხოვა დაევალათ. სახეობრივი კვლევის შედეგები იხილეთ: http://nfa.gov.ge/ge/sursatis-uvnebloba/monitoringi/dokumentebis-shemowmeba
ცხენის ან ვირის ხორცის რეალიზაციის შემთხვევაში, აუცილებელია კანონმდებლობით გათვალისწინებული მოთხოვნების დაცვა. პირუტყვი უნდა იყოს იდენტიფიცირებული, ჩატარებული ჰქონდეს შესაბამისი ვეტერინარული ღონისძიებები (ვაქცინაცია და ა.შ) და უნდა დაიკლას სასაკლაოზე. სავალდებულოა ხორცი იყოს ეტიკეტირებული და მითითებული იყოს ხორცის სახეობა,” - ნათქვამია განცხადებაში.