"საქართველოსა და ბელორუსს შორის მნიშვნელოვანი ეკონომიკური პოტენციალი არსებობს, რომელიც კერძო სექტორმა უნდა გამოიყენოს"
საქართველოს პირველი ვიცე-პრემიერის, ეკონომიკისა და მდგრადი განვითარების მინისტრის, დიმიტრი ქუმსიშვილის განცხადებით, საქართველოსა და ბელორუსს შორის ბოლო ერთ წელიწადში სავაჭრო ურთიერთობები გაღრმავდა და ბრუნვა გაიზარდა.
მისივე თქმით, სავაჭრო ურთიერთობები გაღრმავდა და ბრუნვა გაზრდილია 24 პროცენტით და ორივე მიმართულებით, როგორც საქართველოდან ბელორუსის მხარეს, ისე პირიქით.
”მთავრობათაშორისი კომისიის ჩატარება ეძღვნებოდა იმას, რომ რაც შეიძლება მეტი ახალი სამუშაო ადგილები შეიქმნას ორივე ქვეყანაში და შევძლოთ არსებული პოტენციალის გამოყენება. ეს პოტენციალი, რა თქმა უნდა, კერძო სექტორმა უნდა გამოიყენოს”, - განაცხადა ქუმსიშვილმა საქართველო-ბელორუსის ეკონომიკური მთავრობათაშორისი კომისიის მეოთხე სხდომის დასრულების შემდეგ.
მისივე თქმით, თბილისსა და რეგიონებში გაიხსნა ბელორუსული მაღაზიები, რომლის სახელწოდებაა „ბულბაში“ და ასევე დაგეგმილია მინსკში ქართული პროდუქციის მაღაზიის გახსნა.
”დაგეგმილია მინსკში გაიხსნას ქართული მაღაზია, სადაც წარმოდგენილი იქნება საუკეთესო ქართული პროდუქცია და სუვენირები. ეს, ერთი მხრივ, არის მნიშვნელოვანი იმისთვის, რომ გაიზარდოს ჩვენი სავაჭრო ურთიერთობები და სავაჭრო ბრუნვა, მაგრამ ამავე დროს, ძალიან მნიშვნელოვანია უფრო მეტი ხარისხიანი პროდუქციის მიწოდება ბელორუსის ბაზარზე,“ - განაცხადა პირველმა ვიცე-პრემიერმა დიმიტრი ქუმსიშვილმა.