„მშენებარე კორპუსში ფართის შეძენა ძალიან სარისკოა“
საქართველოში ხშირია შემთხვევა, როცა ადამიანები თავიანთ დანაზოგს ინვესტიციის სახით უძრავ ქონებაში დებენ.
უძრავი ქონების შესაძენად ყველაზე მარტივ გზად კი მშენებარე კორპუსები ესახებათ, რადგან შედარებით დაბალი ფასის გადახდა, თანაც ხშირ შემთხვევაში ეტაპობრივად გადახდა უწევთ. რა თქმა უნდა, შეღავათები კარგია, თუმცა პრაქტიკაზე დაყრდნობით მშენებარე კორპუსებში ფართის შეძენა ბევრ რისკს შეიცავს, რასაც მოქალაქეები უმეტესად არ ითვალისწინებენ.
პრაქტიკიდან გამომდინარე, ყველაზე ცუდი შედეგი, რაც მშენებარე კორპუსში ფართის შეძენას მოჰყოლია, ის არის, რომ მშენებლობა არ დასრულდა, ბინა კი, რომელშიც მოქალაქემ თანხა წინასწარ გადაიხადა, ვერ მიიღო და უსახლკაროდ დარჩა.
ალბათ, ყველას აინტერესებს, როგორ უნდა მოვიქცეთ, რა უნდა გავაკეთოთ, რომ ჩვენც ანალოგიურ სიტუაციაში არ აღმოვჩნდეთ? იმის შესახებ, თუ რა უნდა გაითვალისწინოთ მშენებარე კორპუსში ფართის შეძენისას, უძრავი ქონების სააგენტო Myclient.ge-ს დამფუძნებელი, იურისტი ოთარ კაჭკაჭაშვილი ისაუბრებს.
მისი განმარტებით, ფართის შეძენა მშენებარე კორპუსში, რომლის მშენებლობაც ხელშეკრულების დადებისას დაწყებულიც კი არ არის, შემძენისათვის მნიშვნელოვან საფრთხეებთანაა დაკავშირებული.
„მოქალაქეებს, რომელთაც კონსულტაციის მიზნით მოუმართავთ, ვურჩევ ხოლმე, რომ ასეთი ხელშეკრულების დადებისგან თავი შეიკავონ, რაგან ამ შემთხვევაში ისინი სამშენებლო კომპანიასთან დებენ არა ნასყიდობის, არამედ ნარდობის ხელშეკრულებას. თუმცა, რისკებისგან თავის დაზღვევის მიზნით მიზანშეწონილია, ხელშეკრულება, რომელსაც მხარეები უმეტესად წინარე ნასყიდობის ხელშეკრულებას უწოდებენ, საჯარო რეესტრში დარეგისტრირდეს.“
ამ შემთხვევაში საფრთხეებს ავირიდებთ?
არა, ეს რასაკვირველია, საფრთხეების თავიდან აცილებას ვერ უზრუნველყოფს, რადგან შენობის ექსპლუატაციაში ჩაბარებამდე, ის მესაკუთრე, რომელსაც ფართი აქვს შეძენილი, მშენებარე ფართის მესაკუთრედ ითვლება. მაშინ, როცა მშენებლობის პროცესში სამშენებლო კომპანიის ფინანსური მდგომარეობა მნიშვნელოვნად უარესდება, რის გამოც მშენებლობის დასრულება ვეღარ ხერხდება, შემძენს კი ბინის საფასური სრულად აქვს გადახდილი, რასაკვირველია, ვალდებულების შეუსრულებლობისათვის პასუხისმგებლობა სამშენებლო კომპანიას ეკისრება. თუმცა, ხშირად ასეთ კომპანიებს დიდი დავალიანებები აქვთ საგადასახადო სამსახურის მიმართ და ფიზიკური პირებისთვის თანხის უკან დაბრუნებაც მხოლოდ საგადასახადო ორგანოს დავალიანებების დაფარვის შემდეგ შეიძლება, დაეკისროს.რა რეკომენდაციას მისცემდით მოქალაქეებს ამ საკითხთან დაკავშირებით?
როგორც უკვე აღვნიშნეთ, მშენებარე კორპუსში ბინის შეძენას შემძენისთვის მნიშვნელოვანი საფრთხეები ახლავს, თუმცა თუ მაინც გადაწყვეტენ ასეთი ბინის შეძენას, აუცილებელია, კარგად გაეცნონ ხელშეკრულების პირობებს, გაითვალისწინონ ყველა რისკი, ასევე შეუძლიათ, რომ სამშენებლო კომპანიისგან საბანკო გარანტიაც კი მოითხოვონ და ამის შემდეგ მიიღონ გადაწყვეტილება.წყარო: myclient.ge