მთიან აჭარაში მოგზაურთა რაოდენობა 98%-ით გაიზარდა

აჭარის ავტონომიური რესპუბლიკის მთავრობის ტურიზმისა და კურორტების დეპარტამენტის განცხადებით, 2017 წელს, მაღალმთიან აჭარაში ვიზიტორების რაოდენობა გაიზარდა.

მათივე ინფორმაციით, გასულ წელს, მთიანი აჭარის პოპულარულ ტურისტულ მარშრუტებზე არსებულ საოჯახო-სასტუმრო სახლებს, ტურისტულ ობიექტებსა და მუზეუმებს 46 592 ვიზიტორი სტუმრობდა, რაც 98%-ით აღემატება 2016 წლის მონაცემებს.

„გასულ წელს, ვიზიტორებისთვის პოპულარული იყო მაჭახელას, ქედისა და ხულოს ტურისტული მარშრუტები თავისი ტურისტული ადგილებითა და ღირსშესანიშნაოებებით. +204 % ქედის ტურისტული მარშრუტი; +71% მაჭახელას ტურისტული მარშრუტი; +78% ხულოს ტურისტული მარშრუტი.

აქედან, ყველაზე მეტი 20 298 ვიზიტორი ქედაში არსებულ ღვინის მარნებსა და ტურისტულ ადგილებს, 18 626 ვიზიტორი ხულოს, ხოლო 7 668 მაჭახელას სტუმრობდა.

ვიზიტორების რაოდენობა 32%-ითაა გაზრდილი მაღალმთიან აჭარაში მარშრუტებზე არსებულ მუზეუმებში. წლის განმავლობაში მაჭახელას, ხულოსა და ქედის მუზეუმებს 15 286 ადამიანი სტუმრობდა. ვიზიტორების მატებაა კვების ობიექტებსა და ტურისტულ ობიექტებშიც“, - აცხადებენ ადმინისტრაციაში.

მათივე ცნობით, აჭარის ტურიზმის დეპარტამენტის ტურისტული პროდუქტების განვითარების სააგენტოს ვიზიტორების სტატისტიკა ტურისტულ მარშრუტებზე არსებული საოჯახო-სასტუმრო სახლების, მარნების, კვების ობიექტების, მუზეუმებისა და ფოლკლორული ანსამბლების მიერ მოწოდებულ მონაცემებს ეყრდნობა.

“სასიხარულოა, რომ მთიან აჭარაში მოგზაურთა რიცხვი წლიდან წლამდე იზრდება. ჩვენ აქტიურად ვმუშაობდით სამივე ტურისტული მარშრუტის განვითარება-პოპულარიზაციის მიმართულებით. წლის განმავლობაში 12 ინფოტურს გავუწიეთ ორგანიზება და 180-მდე ადამიანს გავაცანით მთიანი აჭარის ტურისტული შესაძლებლობები. ასევე, გადავამზადეთ გიდები აღნიშნული მარშრუტების მიმართულებით და საბოლოო ჯამში, ამ ყველაფერმა გამოიღო კიდეც შედეგი. წელს, ისევ ვაპირებთ ამ მიმართულებით მუშაობას და ვიმედოვნებთ, რომ მთიან აჭარაში მოგზაურთა რაოდენობა გაიზრდება“, - აღნიშნა აჭარის ტურიზმის დეპარტამენტის თავმჯდომარე სულხან ღლონტმა.