თბილისში მშენებლობებზე K2 კოეფიციენტის გაზრდა კანონით უნდა აიკრძალოს

კომპანია „არსის“ აღმასრულებელი დირექტორი თორნიკე აბულაძე აცხადებს, რომ K2 კოეფიციენტი უძრავი ქონების ბაზრის ეკონომიკის ერთ-ერთი მნიშვნელოვანი ნაწილია, ხოლო ბაზრის ამ სეგმენტის საყრდენი მიწის ღირებულებაა.

როდესაც მიწის ფასი სტაბილური არ არის, ირღვევა უძრავი ქონების ბაზარიც.

„მკაცრად და გარკვევით უნდა ჩაიწეროს კანონში, რომ თბილისში არავითარ შემთხვევაში არ უნდა მოხდეს კოეფიციენტის გადამეტება. სწორედ ამ პრობლემის გამო მივიღეთ ურბანული კოლაფსი დედაქალაქში“, - აცხადებს თორნიკე აბულაძე.

თბილისში მიწის ფასი არასტაბილურია, რაც თორნიკე აბულაძეს დაუშვებლად მიაჩნია. მისივე თქმით, თბილისში მიწის ფასი განისაზღვრება არა მხოლოდ მისი რეალური საბაზრო ღირებულებით, არამედ მიწის მესაკუთრის ნაცნობობისა და „ზურგის“ ზომითაც. ერთი და იგივე მიწა შეიძლება ღირდეს 100 ლარი, თუ ეკუთვნის პეტრეს, ან 150 ლარი, თუ ეკუთვნის პავლეს. იმიტომ, რომ პავლეს, თავისი გავლენიდან გამომდინარე, ორჯერ მეტი ფართის შენობის აშენება შეუძლია, ვიდრე პეტრე შეძლებდა. ხოლო ამის ინსტრუმენტი არის მიწაზე მინიჭებული K2 კოეფიციენტის გადამეტება.

კოეფიციენტი K2 გვიჩვენებს, რა მოცულობის შენობის აგებაა დასაშვები, რაც შემდეგნაირად გამოითვლება: თუ მიწის ნაკვეთი 1000 კვ.მ-ია, ნორმატიული K2 კი – 2,0, ეს ნიშნავს, რომ ამ მიწაზე ავაშენებთ 2,000 კვ.მ-ს, ხოლო თუ K2 იქნება 4,0, მაშინ ზუსტად იგივე ტერიტორიაზე ავაშენებთ 4,000 კვ.მ-ს.

„ეს იწვევს მიწის ფასის არასტაბილურობას და, ასევე, არასამართლიანობის განცდას. არ შეიძლება, გამონაკლისის სახითაც კი, კოეფიციენტის გადამეტება. როგორც კი ამ გამონაკლისს დავუშვებთ, ყველა ეცდება, ამით ისარგებლოს. დარწმუნებული ვარ, მერთან შესული ზარების 70% ამ მიზანს ემსახურება. გადამეტება უნდა აიკრძალოს და სიტუაცია დალაგდება – ხომ არავინ ურეკავს ფინანსთა მინისტრს თხოვნით, რომ დღგ, 18%-ის ნაცვლად, 10% იყოს?“ – აცხადებს კომპანია „არსის“ აღმასრულებელი დირექტორი თორნიკე აბულაძე.

მისივე თქმით, ათწლეულების განმავლობაში ეს ყველა მთავრობის პრაქტიკაა. პოლიტიკური იარაღი არჩევნების დროს, რაც არცერთ ადმინისტრაციას არ უნდა ჰქონდეს.

„კოეფიციენტის გაზრდა და გაყიდვა კანონით უნდა აიკრძალოს“, – აცხადებს „არსის“ დირექტორი.