"თავისუფალი ვაჭრობის შეთანხმება ორმხრივი სავაჭრო სტატისტიკაზე უკვე დადებითად აისახა"
თავისუფალი ვაჭრობის შეთანხმება ორმხრივ სტატისტიკაზე დადებითად უკვე აისახა, - ამის შესახებ ჩინეთის კომერციის მინისტრმა ჭონ შანმა საქართველოს პირველ ვიცე-პრემიერ, ეკონომიკისა და მდგრადი განვითარების მინისტრ დიმიტრი ქუმსიშვილთან და საქართველოს დელეგაციასთან შეხვედრაზე განაცხადა.
როგორც როგორც „ინტერპრესნიუსს“ ეკონომიკისა და მდგრადი განვითარების სამინისტროდან აცნობეს, შეთანხმება, რომლის შესახებაც მოლაპარაკება რეკორდულად მოკლე დროში 7 თვეში დასრულდა, ძალაში 2018 წლიდან შევიდა. შეხვედრაზე ასევე აღინიშნა, რომ შეთანხმების ხელმოწერისა და ამოქმედების შემდეგ ორ ქვეყანას შორის სავაჭრო ბრუნვის ზრდის ტენდენცია სახეზეა, თუმცა პოტენციალი დიდია და მას აუცილებლად ესაჭიროება ორივე მხარისთვის ხელსაყრელი მიმართულების მხარდაჭერა, რისთვისაც ჩინეთის მხარე ქართველ მწარმოებლებს დახმარებას აღმოუჩენს.
უწყების ინფორმაციით, შეხვედრაზე აღინიშნა, რომ ჩინურმა მხარემ დიდი ინტერესი გამოხატა, დაეხმაროს ქართულ კომპანიებს ჩინეთის ბაზარზე პროდუქციის პოპულარიზების მიმართულებით, რაც მნიშვნელოვნად შეუწყობს ხელს საქართველოს ექსპორტის ზრდას ჩინეთში.