საფრანგეთმა თავშესაფრის განაცხადის განხილვის ვადები შეამცირა და ქვეყნიდან გაძევების პროცედურა გაამარტივა
საფრანგეთის პარლამენტმა იმიგრაციისა და თავშესაფრის შესახებ კანონი მიიღო.
კანონპროექტი პარლამენტში საფრანგეთის შს მინისტრმა წარადგინა. აღნიშნული კანონის ფარგლებში ხდება თავშესაფრის განაცხადის განხილვის ვადების შემცირება და ქვეყნიდან გაძევების პროცედურის გამარტივება.
მიღებული კანონის თანახმად, თავშესაფრის შესახებ განაცხადის განხილვის ვადები 11 თვიდან ნახევარ წლამდე შემცირდება. ასევე მარტივდება ქვეყნიდან იმ პირთა იძულებითი გაძევება, ვისაც უარი განუცხადეს. ასევე ადმინისტრატიული დაკავების ცენტრებში მოთავსების ვადა 45 დღიდან 90 დღემდე იზრდება.
საფრანგეთის შს მინისტრის ჟერარ კოლონის თქმით, ახალი კანონი შეზღუდავს მასობრივ მიგრაციას.
აღნიშნულ კანონს მხარი დაუჭირა 228 დეპუტატმა, 139 წინააღმდეგ წავიდა, ხოლო 24-მა დეპუტატმა თავი შეიკავა.
2017 წლის მონაცემებით, დევნილებისა და აპატრიდების დაცვის ბიურომ საფრანგეთში თავშესაფრის მაძიებელთა ასი ათასზე მეტი განაცხადი მიიღო.