კვლევა მომზადდა პროექტის „ეკონომიკის სტიმულირების ანტიკრიზისული პაკეტი“ ფარგლებში.
კვლევის მიზანია საქართველოში დაამკვიდროს კრიზისის მართვის კულტურა და მთავრობას გაუწიოს ექსპერტული დახმარება ეკონომიკის სტიმულირების ანტიკრიზისული პაკეტის შექმნაში.
კვლევის დროს გამოიკვეთა, რომ:
• 2014 წელს იანვარ-მარტში ეკონომიკური ზრდის ტემპი გასულ წელზე მაღალია - წინასწარი მონაცემებით, იანვრის თვეში ეკონომიკურმა ზრდამ 8%, თებერვალში - 5.4%, ხოლო მარტში 8,3 % შეადგინა.
• თუმცა, მაშინ, როცა ბიუჯეტი დაგეგმილია 8,5 პროცენტიან ზრდაზე, 2014 წლის I კვარტლის სახელმწიფო ბიუჯეტის საგადასახადო შემოსავლების განსაზღვრული გეგმა მხოლოდ 4,2%-ით აჭარბებს შარშანდელ მაჩვენებელს.
• 2014 წლის I კვარტლის გეგმა დანაკლისით შესრულდა გრანტების მუხლით, კერძოდ, განსაზღვრული 51,8 მლნ ლარიდან ჩამორიცხული იქნა მხოლოდ 3,2 მლნ ლარი.
• 2014 წელს სახელმწიფო ბიუჯეტის ასიგნებები განსაზღვრულია 9 080.0 მლნ ლარით. აღნიშნული ოდენობიდან პირველ კვარტალში გაწეულმა ხარჯმა შეადგინა 1 840.4 მლნ ლარი, რაც გეგმის 20%-ს შეადგენს; 2014 წლის I კვარტალში ინფრასტრუქტურულ პროექტებზე გაწეული ხარჯები მთლიანი ხარჯების 8,6%-ს შეადგენს მაშინ, როდესაც 2013 წელს ეს მაჩვენებლი იყო 10,9%, ხოლო 2012 წელს - 12,4%; 2013 წლის მთავარი პრობლემა წლის პირველ სამ კვარტალში ხარჯების დაბალი მაჩვენებელი იყო, რამაც საბოლოოდ ბიუჯეტის შემოსავლებისა და ხარჯების დანაკლისი და ბოლო კვარტალში ლარის კურსზე ზეწოლა გამოწვია; 2014 წლის პირველი კვარტლის ხარჯების მონაცემი ადასტურებს, რომ ეს ტენდენცია და საფრთხეები შენარჩუნებული და მეტიც - გაძლიერებულია;
• 2014 წლის ბიუჯეტში, 2013 წელთან შედარებით, ვალის მაჩვენებელი მნიშვნელოვანდ არის გაზრდილი - წელს მოსაზიდი საკრედიტო რესურსია 1,6 მლრდ ლარი, რაც მნიშვნელოვნად აღემატება 2013 წლის ფაქტიურ მაჩვენებელს, - 737,9 მლნ ლარს;
2013 წლის ბიუჯეტთან დაკავშირებით აღსანიშნავია, რომ:
• 2013 წელს სახელმწიფო ბიუჯეტში გადასახადების ნაწილში წარმოქმნილმა დანაკლისმა 632,3 მლნ ლარი შეადგინა.
• გადასახადების მობილიზებაში შექმნილი დანაკლისი 2013 წლის ბოლოს არ დამდგარა. ის, რეალურად, თავდაპირველად დაგეგმილ მაჩვენებლებთან მიმართებაში მთელი წლის განმავლობაში დანაკლისით სრულდებოდა.
• ბიუჯეტის შემოსავლითი ნაწილის გარღვევის პარალელურად, ბიუჯეტის ხარჯვითი ნაწილიც მნიშვნელოვანი ჩამორჩენით შესრულდა. კერძოდ, 2013 წელს დაგეგმილი 8,7 მლრდ ლარიდან გაწეულმა ხარჯმა 8,1 მლრდ ლარი შეადგინა;
ბიუჯეტიდან დაუხარჯავი 644,3 მლნ ლარიდან, 162.0 მლნ ლარი წარმოადგენს დონორების მიერ დაფინანსებული ინვესტიციური პროექტებისათვის გამოყოფილი ასიგნებების აუთვისებელ ნაწილს;
• ფუნქციონალურ ჭრილში პროცენტულად ყველაზე დიდი აუთვისებლობა ჯანმრთელობის დაცვის სფეროზე მოდის - 174 მლნ ლარი დაუხარჯავი დარჩა;
• 2013 წელს დაახლოებით 524 მლნ ლარი შესაძლებელი იყო დამატებით მიმართულიყო ეკონომიკის ხელშემწყობი პროექტების დაფინანსებაზე, რათა თავიდან ყოფილიყო აცილებული ეკონომიკური პროცესების შენელება;