მერია მეტეხისა და გალაკტიონის ხიდების რეაბილიტაციას გეგმავს

დედაქალაქის მერიამ მეტეხისა და გალაკტიონის ხიდების რეაბილიტაციისთვის საპროექტო დოკუმენტაციის შედგენაზე ტენდერი გამოაცხადა.

სატენდერო პირობების თანახმად, წინადადებების მიღება 18 მაისს იწყება და 21 მაისს დასრულდება. შესყიდვის სავარაუდო ღირებულება კი 50-50 ათასი ლარია.

„რეაბილიტაციას საჭიროებს ხიდზე წყალმოცილების სისტემა; რეაბილიტაციას საჭიროებს ხიდის ჰიდროიზოლაცია თანამედროვე მასალების გამოყენებით; რეაბილიტაციას საჭიროებს ხიდის მცირე მალის თაღის ქვედა ზონა; რეაბილიტაციას საჭიროებს დიდი მალის თაღის კონსტრუქციების დამცავი შრე; რეაბილიტაცის საჭიროებს მარცხენა ნაპირის ზემომხრის მიწაყრილის დამცავი საფარი. ხიდზე განათების პროექტის მომზადება დამკვეთთან შეთანხმებით,“-აღნიშნულია მეტეხის ხიდის რეაბილიტაციის მოსამზადებელ პროექტზე გამოცხადებულ ტენდერში.

გალაკტიონის ხიდის შემთხვევაში სატენდერო დოკუმენტაციის თანახმად, რეაბილიტაციას საჭიროებს - მისასვლელი მიწაყრილი მარცხენა ნაპირზე; რეაბილიტაციას საჭიროებს თაღების ქვედა ზედაპირების ბეტონი; გამოტუტვის ლაქებისაგან გასაწმენდია ხიდის მოპირკეთების ქვები; მიმდინარე რემონტს საჭიროებს ტროტუარის კონსოლების ბეტონი; გასაწმენდია ხიდის წყალმოცილების სისტემა; რეაბილიტაციას საჭიროებს ხიდზე არსებული არქიტექტურული ელემენტები; ხიდზე უხამსი გრაფიტისაგან გასაწმენდია მოპირკეთების ფილები; აღდგენას საჭიროებს ხიდის სამომსახურეო შესასვლელები (დალუქულია ყველა ჩასასვლელი ჭა). ასევე გათვალისწინებულია დამკვეთთან შეთანხმებით, ხიდზე განათების პროექტის მომზადება.