საქართველოდან თურქეთში ექსპორტირებული ელექტროენერგიის მოცულობა მაისში 61.4%-ით გაიზარდა

საქართველოდან თურქეთში ექსპორტირებული ელექტროენერგიის მოცულობა მნიშვნელოვნად გაიზარდა და მიმდინარე წლის 9 მაისის მდგომარეობით, 63 715 ათასი კვტ. სთ. შეადგინა, - ამის შესახებ ეკონომიკისა და მდგრადი განვითარების სამინისტროდან იუწყებიან. პირველი ვიცე-პრემიერის, ეკონომიკისა და მდგრადი განვითარების მინისტრის დიმიტრი ქუმსიშვილის განცხადებით, საქართველოს მთავრობის მიზანია, ეს მონაცემები კიდევ გაიზარდოს და საქართველო ენერგეტიკული ჰაბი გახდეს.

„თურქეთთან უფრო ინტენსიური თანამშრომლობისკენ მივდივართ, რათა კიდევ უფრო მეტად მოხდეს ბაზრების ინტეგრირება“, - აღნიშნა ქუმსიშვილმა.

სამინისტროს ინფორმაციით, საქართველოდან თურქეთში ექსპორტირებული ელექტროენერგიის მოცულობა დღეის მდგომარეობით 61.4%-ით აღემატება წინა წლის იმავე პერიოდის მონაცემს.

„ამჟამად თურქეთის მიმართულებით 324 მეგავატის მიწოდება ხდება, რაც რეკორდული მაჩვენებელია. გასულ წელს ამ მაჩვენებელმა 166 მგვტ. შეადგინა, 2016 წელს კი 99 მგვტ-ი. სულ, მიმდინარე წელს ექსპორტირებული ელექტროენერგიის მოცულობამ შეადგინა 125 021 ათასი კვტ. სთ, რაც 208,5 %-ით აღემატება 2017 წლის რაოდენობას,“ - ნათქვამია ინფორმაციაში.

დიმიტრი ქუმსიშვილის თქმით, აღნიშნული მატება თურქეთის რესპუბლიკაში გაცემული ენერგიის რაოდენობის ზრდით არის განპირობებული, რამაც მიმდინარე წელს 50 261 ათასი კვტ.სთ. შეადგინა. ამასთან, მაისში დაგეგმილია 238 195 ათასი კვტ. სთ. ელექტროენერგიის გაცემა, რაც 19,6%-ით აღემატება გასული წლის რაოდენობას (199 181 კვტ.სთ).

პირველი ვიცე-პრემიერის განცხადებით, ექსპორტის მოცულობის მატება საქართველოს თურქულ მხარესთან ინტენსიური მუშაობის შედეგია, ამ საკითხზე ორმხრივ ფორმატში შეხვედრები თებერვალსა და აპრილში გაიმართა.