ჭიათურის საბაგირო წლის ბოლოს გაიხსნება
ჭიათურაში საბაგირო გზების სისტემებისა და სადგურების განახლება გრძელდება. რეგიონული განვითარებისა და ინფრასტრუქტურის სამინისტროს ინფორმაციით, საბაგირო ტრანსპორტი, ჭიათურის მთა-გორიან რელიეფზე, მე-20 საუკუნის 50-იანი წლებიდან გადაადგილების ერთ-ერთი ძირითადი საშუალებაა.
მათივე ინფორმაციით, ყოფილ საბჭოთა კავშირში, პირველი სამგზავრო საბაგირო გზა, სწორედ ჭიათურაში აშენდა, თუმცა 3 ათეული წელია ხაზები და გონდოლები ვეღარ აკმაყოფილებდა თანამედროვე მოთხოვნებს და საფრთხეს უქმნიდა მგზავრებს. ამიტომ, სამგზავრო საბაგიროს მუშაობა 2016 წელს შეწყდა.
საფრანგეთის მთავრობის მხარდაჭერით, რეგიონული განვითარებისა და ინფრასტრუქტურის სამინისტრომ, გასულ წელს, საბაგირო გზებისა და სადგურების რეკონსტრუქცია დაიწყო. პროექტის თანახმად, სრულად აღდგება ცენტრალური სადგური და მისგან გამავალი სამი მიმართულება. გზის საერთო სიგრძე 3428 მეტრია.
რევერსიული, გონდოლებიანი საბაგირო გზის მოწოდება ფრანგულმა კომპანიამ „Pomagalski“ უზრუნველყო. პროექტის საერთო ღირებულება 40 მილიონ ლარს აღწევს.
სამშენებლო სამუშაო ჭიათურაში რეგიონული განვითარებისა და ინფრასტრუქტურის მინისტრმა მაია ცქიტიშვილმა, მინისტრის მოადგილემ გრიგოლ კაციამ, მუნიციპალური განვითარების ფონდის აღმასრულებელმა დირექტორმა გაგი ბუაძემ და ადგილობრივი ხელისუფლების წარმომადგენლებმა დაათვალიერეს.
“წლის ბოლოს, პროექტის დასრულების შემდეგ, ეკოლოგიურად სუფთა, ახალი სამგზავრო-საბაგირო ტრანსპორტით, ადგილობრივები და ჭიათურის სტუმრები ისარგებლებენ,” - ნათქვამია სამინისტროს ინფორმაციაში.