აშშ-ში მსოფლიოს უძლიერესი სუპერკომპიუტერი შექმნეს
აშშ-მა ჩინეთს გაასწრო და მსოფლიოში უმძლავრესი გამომთვლელი მანქანა შექმნა, რომლის წარმადობაც 200 პეტაფლოპს უდრის.
ამის შესახებ გამოცემა MIT Technology Review იუწყება.
როგორც გამოცემა წერს, აშშ-ს ენერგეტიკის სამინისტროს კვლევითმა ლაბორატორიამ ტენესის შტატში, ქალაქ ოუკ-რიჯში, აამოქმედა მსოფლიოში ყველაზე მძლავრი სუპერკომპიუტერი სახელწოდებით Summit, რომლის პიკური წარმადობა აღწევს 200 პეტაფლოპს, ანუ 200 კვადრილიონ ოპერაციას წამში.
„Summit აწარმოებს გამოთვლებს და მილიონჯერ სწრაფია, ვიდრე ჩვეულებრივი ლეპტოპი და 60%-ით უფრო ძლიერი, ვიდრე აქამდე არსებული სუპერკომპიუტერი - ჩინური Sunway TaihuLight, რომლის წარმადობაც 93 კვადრილიონ ოპერაციას შეადგენს წამში. მოწყობილობა ორი ტენისის კორტის ზომისაა და ავიალაინერზე მეტს იწონის“, - წერს გამოცემა.
შეგახსენებთ, აქამდე მსოფლიოს სუპერკომპიუტერების ხუთეულში მხოლოდ ერთი ამერიკული სუპერკომპიუტერი შედიოდა სახელწოდებით Titan, რომელიც ასევე ოუქ რიჯშია განთავსებული, დანარჩენ პოზიციებზე კი 2 ჩინური, შვეიცარული და იაპონური სუპერკომპიუტერები იმყოფებოდა.
კოკა კვირკველია