"რკინიგზაში ჩემი გენერალური დირექტორობის პერიოდში, შემოსული იყო აუდიტის სამსახური და ჩაატარა ის პროცედურები, რომელიც აუცილებელი იყო"

პრემიერ-მინისტრობის კანდიდატის, მამუკა ბახტაძის განცხადებით, მისი გენერალური დირექტორობის დროს რკინიგზაში სახელმწიფო აუდიტის სამსახური შესამოწმებლად იყო შესული.ასე უპასუხა მამუკა ბახტაძემ “ნაციონალური მოძრაობის“ წევრის, ნიკა მელიას კითხვას იმის შესახებ, თუ რატომ დასჭირდა სახელმწიფო აუდიტის სამსახურს სასამართლოში სარჩელის შეტანა იმის შესახებ, რომ რკინიგზა შეემოწმებინა.

“ჩემი გენერალური დირექტორობის პერიოდში, შემოსული იყო აუდიტის სამსახური და ჩვეულებრივად ჩაატარა ის პროცედურები, რომელიც აუცილებელი იყო. 2012 წლის ზაფხულში, მაშინ, როცა რკინიგზამ გამოუშვა თავისი ობლიგაციები ლონდონის ბირჟაზე, აღებული იქნა ვალდებულება, რომ „საქართველოს რკინიგზა“ შემოწმდებოდა მხოლოდ დიდი ოთხეულის აუდიტორის მიერ“, - განაცხადა ბახტაძემ.