მამუკა ბახტაძე - წელს ჩვენ გვექნება საუკეთესო სავაჭრო ბრუნვა იტალიასთან
წელიწადნახევრის განმავლობაში საქართველოსა და იტალიას შორის მესამე ბიზნეს ფორუმი იმართება, რაც კიდევ ერთხელ ნათლად მიუთითებს იმაზე, რომ ჩვენ ქვეყნებს შორის სავაჭრო პოტენციალი საკმაოდ მაღალია, - ამის შესახებ საქართველოს პრემიერ-მინისტრმა მამუკა ბახტაძემ იტალია-საქართველოს ბიზნეს ფორუმზე სიტყვით გამოსვლისას განაცხადა.საქართველოს პრემიერმა ორ ქვეყანას შორის სავაჭრო ურთიერთობებსა და თავისუფალი ვაჭრობის შეთანხმებაზე ისაუბრა.
„წელს გვექნება ჩვენ საუკეთესო სავაჭრო ბრუნვა იტალიასთან. ეს მიუთითებს იმაზე, რომ ის ნაბიჯები, რომელიც ჩვენ გადავდგით ბოლო პერიოდის განმავლობაში არის საკმაოდ შედეგიანი. ასევე მინდა აღვნიშნო, რომ საქართველოდან იტალიაში ექსპორტზე გადის სხვადასხვა სახის პროდუქცია, ეს გახლავთ თხილი, ტექსტილის ნაწარმი, მინერალური სასუქები, ღვინო, ფეროშენადნობები და ბევრი სხვა. ორ ქვეყანას შორის არსებულ ეკონომიკურ ურთიერთობებზე, რა თქმა უნდა, მნიშვნელოვან გავლენას ახდენს DCFTA-ს ხელმოწერილი დოკუმენტი, რომელმაც ჩვენი ურთიერთობა ხარისხობრივად ახალ საფეხურზე აიყვანა.
მთავრობა აქტიურად ახორციელებს რეფორმებს, რომლებიც DCFTA-თი არის გათვალისწინებული. ჩვენ მივიღეთ გადაწყვეტილება, რომ გავაკეთოთ ამ პროცესის დაჩქარება, რათა რაც შეიძლება მოკლე ვადებში დავასრულოთ ყველა ის ვალდებულება, რაც გათვალისწინებულია.
მხოლოდ წელიწადნახევრის განმავლობაში საქართველოსა და იტალიას შორის მესამე ბიზნეს ფორუმი იმართება, რაც კიდევ ერთხელ ნათლად მიუთითებს იმაზე, რომ ჩვენ ქვეყნებს შორის სავაჭრო პოტენციალი საკმაოდ მაღალია“, -განაცხადა მამუკა ბახტაძემ.