აშშ-ის ათასწლეულის გამოწვევის კორპორაციის ვიცე პრეზიდენტი სინტია ჰუგერი საქართველოში მიმდინარე 140 მილიონი აშშ დოლარის კომპაქტის შედეგებს ეცნობა

21-24 აგვისტოს, აშშ-ის მთავრობის ათასწლეულის გამოწვევის კორპორაციის ვიცე პრეზიდენტი სინტია ჰუგერი თბილისში სამუშაო ვიზიტის ფარგლებში „ათასწლეულის გამოწვევის ფონდი - საქართველოს“ საგანმანათლებლო პროექტების შედეგებს და მიმდინარე საქმიანობას ეცნობა.როგორც „ათასწლეულის გამოწვევის ფონდი-საქართველოდან“ იუწყებიან, ვიცე პრეზიდენტი ჰუგერი ამ პოზიციაზე მის პირველ საერთაშორისო ვიზიტს საქართველოში მართავს. დღეს სინტია ჰუგერი ათასწლეულის გამოწვევის ფონდის პროექტის, „პროფესიული განათლება ეკონომიკის განვითარებისთვის“ დაფინანსების ფარგლებში სარკინიგზო ტრანსპორტის კოლეჯს მოინახულებს, რომელსაც ახალი პროფესიული პროგრამები დაემატა.

„ათასწლეულის გამოწვევის ფონდი-საქართველოს“ ინფორმაციით, ვიზიტის ფარგლებში, ვიცე პრეზიდენტი ოფიციალურ შეხვედრას გამართავს ასევე საქართველოს პრემიერ-მინისტრ მამუკა ბახტაძესთან. შეხვედრის დროს მხარეები განიხილავენ ათასწლეულის გამოწვევის 140 მილიონი აშშ დოლარის კომპაქტის ფარგლებში ოთხი წლის განმავლობაში წარმატებით განხორციელებულ პროექტებს.

ვიზიტის ფარგლებში, ჰუგერი, შეხვედრას გამართავს საქართველოს განათლების, მეცნიერების, კულტურისა და სპორტის მინისტრ მიხეილ ბატიაშვილთანაც. ის ასევე შეხვდება კომპაქტის პროექტების ბენეფიციარებს, დაათვალიერებს ახლად აშენებულ სან დიეგოს სახელმწიფო უნივერსიტეტის კამპუსსა და რკინიგზის კოლეჯის ახლად რეაბილიტირებულ შენობას. ხოლო, 24 აგვისტოს დაესწრება გოგოების სართაშორისო ბანაკის „ქალები მეცნიერებაში“ (WiSci – Georgia) დახურვის ცერემონიას. ბანაკი პირველად იმართება საქართველოში ათასწლეულის გამოწვევის კორპორაციის ფინანსური მხარდაჭერით. საერთაშირისო ბანაკის ორგანიზატორია გაერთიანებული ერების ფონდის პროგრამა GirlUp-ი და ათასწლეულის გამოწვევის ფონდი, ხოლო პარტნიორები არიან კომპანიები Intel, Google, Microsoft და მიკრობიოლოგიის ამერიკული ასოციაცია. ბანაკში მონაწილეობას იღებს 100 გოგონა მსოფლიოს სხვადასხვა ქვეყნიდან.

კომპაქტის ფარგლებში, ათასწლეულის გამოწვევის ფონდი - საქართველო ახორციელებს ზოგადი, პროფესიული და უმაღლესი განათლების პროექტებს, რაც ხელს უწყობს ადამიანური კაპიტალის გაძლიერებას საინჟინრო, ტექნოლოგიურ და საბუნებისმეტყველო სექტორებში. მათ შორის კომპაქტის ფარგლებში, სრული რეაბილიტაცია უტარდება საჯარო სკოლებს რეგიონებში, მიმდინარეობს მასწავლებლების პროფესიული განვითარების ტრენინგ პროგრამა, დაიწყო ახალი პროფესიული საგანმანათლებლო პროგრამები და საქართველოში 2015 წლიდან შემოვიდა აშშ-ის სან დიეგოს სახელმწიფო უნივერსიტეტი, რომელიც აშშ-ში აკრედიტებულ ბაკალავრიატის საგანმანათლებლო პროგრამებს სთავაზობს სტუდენტებს საქართველოში, რაც საბოლოო ჯამში ხელს უწყობს ადამიანური კაპიტალის განვითარებას ქვეყნის ეკონომიკისთვის პრიორიტეტულ დარგებში.

„ათასწლეულის გამოწვევის ფონდი-საქართველოს“ ინფორმაციით, კომპაქტი წარმოადგენს აშშ-სა და საქართველოს შორის მიმდინარე სტრატეგიული პარტნიორობის წარმატებულ მაგალითს და უმსხვილეს ინვესტიციას, აშშ-ის მთავრობის გრანტს, საქართველოს განათლების სისტემის გაძლიერებისთვის.