ღარიბაშვილის მიერ გახსნილი საწარმო ერთ დღეში დაიხურა?

პრემიერ-მინისტრის მიერ გურჯაანის რაიონის სოფელ ჩუმლაყში გუშინ გახსნილი ხილის შემნახველი საწარმო, დღეს დაკეტილია.

ამის შესახებ ინფორმაციას კახეთის საინფორმაციო ცენტრი ავრცელებს. გამოცემის ინფორმაციით, ტერიტორიაზე მხოლოდ დაცვის 3 თანამშრომელი იმყოფება. ერთ-ერთი თანამშრომლის თქმით, საწარმო ჯერ არ მუშაობს. რაც შეეხება გუშინ გავრცელებულ ვიდეომასალას, სადაც ჩანდა, რომ საწარმომ ატამი მიიღო და მისი დაფასოება მიმდინარეობდა, დაცვის თანამშრომლის თქმით, სპეციალურად პრემიერის ვიზიტისთვის 300 კილორამი ატამი ახლობლისგან ჩაიბარეს.

"ქართული ხილის კომპანია" ამასთან დაკავშირებით განცხადებას ავრცელებს, სადაც ნათქვამია, რომ საწარმო 12 ივნისს საზეიმოდ გაიხნსა და ამ ეტაპზე საწარმოს ადმინისტრაციული ნაწილი მუშაობს, ხოლო საოპერაციო ნაწილი მოსავლის მისაღებად მზად არის და საექსპორტო ხილის სეზონის გახსნისთანავე ჩაეშვება. მოსავლის  ჩაბარება 20-25 ივნისიდან დაიწყება და ამ პროცესის ნახვა ნებისმიერ დაინტერესებულ პირს შეუძლია. განცხადებაში ნათქვამია, რომ გუშინ გაიმართა საწარმოს ოფიციალური გახსნა და ხილის დამუშავების სადემონსტრაციო ჩვენება, რომელსაც ესწრებოდა პრემიერ-მინისტრი, კომპანიის უცხოელი ბიზნესპარტნიორები და სხვა საპატიო სტუმრები. განცხადებაში ასევე ნათქვამია, რომ გადამამუშავებელი საწარმოს გახსნა სეზონის დადგომამდე მიღებული პრაქტიკაა, რადგან ფერმერებისთვის ინფორმაცია წინასწარ იყოს ხელმისაწვდომი და მოსავლის აღებას მომზადებული შეხვდნენ.

სოფელ ჩუმლაყში ხილის შემნახველი საწარმო შპს "ქართული ხილის კომპანიას" ეკუთვნის. მთავრობის ადმინისტრაციის ინფორმაციით, კომპანია 2013 წელს დაფუძნდა და შეღავათიანი აგროკრედიტის პროექტის ფარგლებში 600 000 დოლარის ოდენობის 3%-იანი კრედიტი მიიღო. კომპანიას შეძენილი აქვს ხილის დამხარისხებელი იტალიური დანადგარები. საწარმო ორი ნაწილისაგან შედგება, რომელთაგან ერთში ხილის დამუშავება, გასუფთავება და დაფასოება ხდება, ხოლო მეორე 400-ტონიანი სამაცივრე მეურნეობაა.