"დედაქალაქის მთავრობა სატრანსპორტო და ეკოლოგიური მდგომარეობის გასაუმჯობესებლად კომპლექსურ სამუშაოებს ახორციელებს"
თბილისის საკრებულოს წევრი ლევან არველაძე დედაქალაქში სატრანსპორტო ინფრასტრუქტურის საკითხზე თბილისის მერის განცხადებას გამოეხმაურა.მისი თქმით, დედაქალაქის მთავრობა სატრანსპორტო და ეკოლოგიური მდგომარეობის გასაუმჯობესებლად კომპლექსურ სამუშაოებს ახორციელებს.
“ტაქსების ლიცენზირებასთან დაკავშირებით, მინიმალური სტანდარტის დაწესება, ერთის მხრივ, უსაფრთხო და კომფროტული მგზავრობის წინაპირობაა და მეორეს მხრივ, დამატებითი შემოსავლის მიღების შესაძლებლობაა მძღოლებისთვის, რომლებიც ავტომობილზე, სპეციალურად გამოყოფილ ადგილას, რეკლამას განათავსებენ”, -განაცხადა ლევან არველაძემ.
საკრებულოს წევრი სატრანსპორტო სფეროში დაგეგმილ სიახლეებსაც გამოეხმაურა. არველაძის თქმით, 2019 წელს მეტროს დამატებით 16 ერთეული მოდერნიზებული ვაგონი დაემატება, დედაქალაქში 90 ახალი თანამედროვე, ეკოლოგიურად სუფთა ევრო-5 სტანდარტის ავტობუსი შემოვა და ასევე მიმდინარეობს 220-ერთეულ ავტობუსზე ფასთა გამოკითხვა, რომლის ტენდერის გამოცხადება ნოემბრის თვეში იგეგმება.
ჯამში თბილისის მერია ბიუჯეტიდან, 2018 წელს, დაახლოებით 150 მლნ ლარის შესყიდვას განახორციელებს.