"მთავრობა აფასებს იმ თანადგომას, რომელსაც აზიის განვითარების ბანკი საქართველოს სტრუქტურული და ეკონომიკური რეფორმების განხორციელების პროცესში უწევს"
საქართველოს ფინანსთა მინისტრი ივანე მაჭავარიანი აზიის განვითარების ბანკის ვიცე-პრეზიდენტს ვენჩაი ჟანგს სავალუტო ფონდისა და მსოფლიო ბანკის წლიური შეხვედრების ფარგლებში შეხვდა.
ფინანსთა სამინისტროს ცნობით, შეხვედრაზე საუბარი მიმდინარე და სამომავლო თანამშრომლობის საკითხებს შეეხო.
მათი ინფორმაციით, შეხვედრისას მიმოიხილეს ინფრასტრუქტურის, ენერგეტიკის, წყლისა და წყალარინების სისტემების რეაბილიტაცია/მშენებლობის, ასევე, მუნიციპალური და საქალაქო ინფრასტრუქტურის მიმართულებით საქართველოსა და ADB-ის თანამშრომლობის საკითხები.
ხაზი გაესვა, აზიის განვითარების ბანკის მხრიდან გაწეულ მნიშვნელოვან დახმარებას საპენსიო რეფორმის, კერძო და საჯარო პარტნიორობის სისტემის ჩამოყალიბებისა და კაპიტალის ბაზრის განვითარების მიმართულებით.
ყურადღება გამახვილდა 2019-2021 წლების თანამშრომლობის სფეროებზე, რომელთა შორის პრიორიტეტულად დასახელდა განათლების სექტორი, სადაც აზიის განვითარების ბანკი მზადაა აქტიურად ჩაერთოს მომავალი რეფორმების განხორციელების პროცესში.
როგორც, ფინანსთა მინისტრმა აღნიშნა, მთავრობა აფასებს იმ თანადგომას, რომელსაც აზიის განვითარების ბანკი უწევს საქართველოს სტრუქტურული და ეკონომიკური რეფორმების განხორციელების პროცესში.
თავის მხრივ, ბანკის ვიცე-პრეზიდენტმა აღნიშნა, რომ ADB-ი მომავალშიც გააგრძელებს ქვეყნის მხარდაჭერას ყველა მიმართულებით, მათ შორის, ტექნიკური დახმარებისა და გამოცდილების გაზიარების კუთხით.