„რეზონანსი" - ერთ თვეში ბინების გაძვირება დაიწყება და 2-3 წელი გაგრძელდება

დედაქალაქში ახალაშენებული ბინის ფასი 15%-ით გაიზრდება.

მიზეზი 1-ლი იანვრიდან ასამოქმედებელი რეგულაციაა. საუბარია ისეთ უსაფრთხოების სტანდარტებზე, როგორებიცაა სახანძრო და დაპროექტების, ასევე მშენებლობაზე დასაქმებულთა რისკების მინიმუმამდე დაყვანა. როგორც გაზეთი „რეზონანსი" წერს, თითოეულ კვადრატულ მეტრზე ფასის 100-150 დოლარით მატების შესახებ „არსის" დირექტორი საუბრობს, თუმცა ასეთი ნახტომისებური ზრდის ტენდენციას არ ეთანხმებიან სხვა მშენებლები.

როგორც ყველა ახალი რეგულაციის ამოქმედებისას, კერძო ბიზნესი კვლავ ფასის მატებით იმუქრება. იმ შემთხვევაში, თუ სახელმწიფო სტანდარტების დაცვას მოითხოვს, ყველა კომპანია გაძვირებაზე აპელირებს. ამჯერად საუბარია უსაფრთხოების მინიმალური ნორმების დაცვაზე.

მთავრობის 620-გვერდიან 41-ე დადგენილებაში საუბარია უსაფრთხოების მისაღწევად საჭირო მინიმალურ მოთხოვნებზე, როგორებიცაა:

გასასვლელების სათანადოდ დაპროექტება, ხანძრისა თუ სხვა საფრთხეებისაგან დაცვა, კიბეებისა თუ ლიფტების შესაბამისი წესების დაცვით მოწყობა და ა. შ. ხოლო სამშენებლო პროდუქტების შესახებ რეგლამენტი მშენებლებს ხმაურის რეგულირებას, ენერგოეფექტური და გაცილებით უფრო მდგრადი მასალების გამოყენებას ავალდებულებს.

დეველოპერული კომპანია  „არსის" ფინანსურმა დირექტორმა თორნიკე აბულაძემ `საქმეში~ განაცხადა, რომ უახლოეს მომავალში 1 კვ/მეტრზე 100-დოლარიან გაძვირებას ელოდებიან კომპანიაში.

„დღეს ბაზაზე ძალიან ბევრი პროექტია, რომელიც ჯერ კიდევ მთავრობის 41-ე დადგენილების ძალაში შესვლამდე იყო დამტკიცებული. როგორც კი ბალანსი შეიცვლება, ეს იაფად აშენებული ბინები ამოიწურება და უმრავლესობა ამ დადგენილების მიხედვით იქნება აშენებული, ფასებიც გაიზრდება.

ამას კიდევ სხვადასხვა კომპონენტი ემატება, მათ შორის, სამშენებლო პროდუქტების შესახებ ტექნიკური რეგლამენტი და ცხადია, რომ ეს ყველაფერი უძრავ ქონებაზე ფასების ზრდას გამოიწვევს. უახლოეს მომავალში 1 კვადრატულ მეტრზე 100-დოლარიან გაძვირებას ველოდებით, თუმცა ეს 100-დოლარიანი ნამატი თვითღირებულებისა იქნება. შესაბამისად, კომპანიების მხრიდან გასაყიდი ფასი კიდევ უფრო მეტით – პირობითად, 120-130-150 დოლარით გაიზრდება", - აღნიშნა აბულაძემ.

„აიჯიეს ჯგუფის" დამფუძნებელი, უძრავი ქონების სფეროს სპეციალისტი შოთა გუჯაბიძე კი აცხადებს, რომ უკვე ამოქმედებული და ასამოქმედებელი რეგულაციებით, იპოთეკური სესხის პირობების შეცვლით, დოლარის კურსისა და სხვა ფაქტორების გათვალისწინებით, ფასი ნამდვილად გაიზრდება, თუმცა – ნელი დინამიკით.

„ესა თუ ის კონკრეტული რეგულაციის განხილვა გაძვირების ან ფასის კლების კუთხით არასწორია. ცენტრალურ უბნებში, ახალაშენებული ბინის საშუალო ფასი 800-1000 დოლარია, გამოდის, 100 დოლარით ფასის მატება 15 პროცენტით გაძვირებას ნიშნავს. წინასწარი კვლევებისა და დინამიკაში დაკვირვების გარეშე, მხოლოდ ამ განცხადებაზე დაყრდნობა და მისი სერიოზულად აღქმა თავად სამშენებლო ბიზნესისათვის საფრთხის შემცველია.

ფასწარმოქმნის მექანიზმი ასეთია: გაძვირებას ახასიათებს ფრთხილი და ძალიან ნელი დინამიკა, როცა საუბარია ისეთ მყარ რამეზე, როგორიც უძრავი ქონებაა. რაც შეეხება კლებას, აქ ნამდვილად შეიძლება იყოს შოკური ეფექტით უეცარი ფასის დავარდნა.

მომავალ 2-3 თვეში 15%-ით ფასის მომატება ნაკლებად სავარაუდოა. ღირებულება ნამდვილა გაიზრდება ობიექტური ფაქტორების გამო, მაგრამ, ალბათ, ბევრად უფრო ნაკლები ტემპით. გაძვირებას განაპირობებს რეგულაციები, იანვრიდან დ ასამოქმედებელი საბანკო დაკრედიტების პოლიტიკის ცვლა, რომელიც იპოთეკურ სესხებსაც შეეხო, დოლარის კურსი და ა. შ. ამ კომპლექსური ფაქტორებით დღევანდელი დინამიკა იმგვარია, რომ ფასი მიდის ზრდისაკენ და ეს გაგრძელდება, მაგრამ, საბოლოოდ, ფასში აისახება 2-3 წლის შემდგომ პერიოდში. ეს არ ნიშნავს, რომ იქამდე უძრავი ქონების ფასი არ მოიმატებს, გაძვირება იქნება ნელი და სტაბილური ტემპით.

პროცენტულ მაჩვენებლებზე საუბარი შედარებით სტატისტიკის, კვლევისა და ანალოგების განხილვის გარეშე არასერიოზულად მეჩვენება", - აცხადებს გუჯაბიძე „რეზონანსთან".

თამარ მუკბანიანი

გაზეთი „რეზონანსი"