საბაჟო გამშვები პუნქტის "სადახლო-საავტომობილოს" მებაჟე ოფიცრებმა, დღეს, უკანონოდ შემოტანილი ოქროს ნაკეთობები და სიგარეტი აღმოაჩინეს.
შემოსავლების სამსახურის ინფორმაციით, 21 ათასი ღერი სიგარეტი დეკლარირების გარეშე საქართველოს ტერიტორიაზე სომხეთის მოქალაქე ა.დ.-ს შემოჰქონდა. საქონელი მგზავრის კუთვნილი ავტომანქანის დათვალიერებისას, სპეციალურად მოწყობილ სამალავში, აღმოაჩინეს.
საქმე შემდგომი რეაგირების მიზნით გადაეცა საქართველოს ფინანსთა სამინისტროს საგამოძიებო სამსახურს.
დღესვე, "სადახლო-საავტომობილოზე" სომხეთის მხრიდან შემოვიდა სომხეთის მოქალაქე მ. კ., რომლის დათვალიერების შედეგად შემოსავლების სამსახურის თანამშრომლებმა არადეკლარირებული 20 ცალი ოქროს ბეჭედი და 8 წყვილი ოქროს საყურე აღმოაჩინეს. საქონლის საერთო წონამ 122,35 გრ, საერთო ღირებულებამ კი 5221,90 ლარი შეადგინა.
საგადასახადო კოდექსის 289-ე მუხლის მე-10 ნაწილის თანახმად, პიროვნებას სანქციის სახით შეეფარდა ფულადი ჯარიმა - 5221,90 ლარი.