10 საგზაო დარღვევა, რის გამოც ყველაზე მეტი მძღოლი დაჯარიმდა
საგზაო მოძრაობის წესების დარღვევის გამო, 2018 წელს ჯამში 2 372 855 საჯარიმო ქვითარია გამოწერილი. ამის შესახებ ინფორმაცია შინაგან საქმეთა სამინისტროს მიერ გამოქვეყნებულ სტატისტიკაშია აღნიშნული.
ყველაზე მეტი საჯარიმო ქვითარი საანგარიშო პერიოდში გამოწერილია - საგზაო ნიშნის/მონიშვნის, ბუქსირების, ხმოვანი სიგნალით თუ საავარიო შუქსიგნალიზაციით სარგებლობის წესების დარღვევაზე, ასევე მოტოციკლით ან სხვა სატრანსპორტო საშუალებით ჯგუფურ მოძრაობაში მონაწილეობაზე, რაც საგზაო მოძრაობას აფერხებს ან მოძრაობის უსაფრთხოებას უქმნის საშიშროებას. კერძოდ, ამ ტიპის ადმინისტრაციულ სამართალდარღვევაზე წინა წლის განმავლობაში ჯამში, 724 165 საჯარიმო ქვითარია გამოწერილი. ცნობისთვის, აღნიშნული სამართალდარღვევა 20-ლარიან ჯარიმას ითვალისწინებს.
დაჯარიმების მიხედვით, მეორე ადგილზეა - ამკრძალავი ნიშნების „გაჩერება აკრძალულია“ და „დგომა აკრძალულია“ მოთხოვნების დაუცველობა, აგრეთვე დგომა-გაჩერების წესებით გათვალისწინებული სხვა მოთხოვნის დარღვევა. შს სამინისტროს ინფორმაციით, 2018 წელს ამ ტიპის დარღვევებზე - 542 027 ჯარიმაა გამოწერილი. რაც შეეხება სანქციის მოცულობას, ის 10 ლარს შეადგენს.
გამოწერილი 456 989 საჯარიმო ქვითრით, საგზაო მოძრაობის დარღვევათა ჩამონათვალში მე-3 პოზიციაზეა - სიჩქარის გადაჭარბება 15 კმ/სთ-ზე მეტი სიჩქარით (მაგრამ არაუმეტეს 40 კმ/სთ), რაც 50-ლარიანი ჯარიმით ისჯება.
საგზაო მოძრაობის წესების ადმინისტრაციულ სამართლადარღვევათა ჩამონათვალში მე-4 და მე-5 ადგილს უწყვეტი ღერძულა ხაზის გადაკვეთა და უსაფრთხოების ღვედების გამოიყენებლობა იკავებს. კერძოდ, 2018 წელს შემხვედრი სატრანსპორტო ნაკადის გამყოფი უწყვეტი ღერძულა ხაზის გადაკვეთის გამო - 107 854; ხოლო მძღოლის ან მის გვერდით მჯდომი მგზავრის მიერ უსაფრთხოების ღვედის გამოუყენებლობისთვის - 102 968 საჯარიმო ქვითარი გამოიწერა. ფულადი სანქციის ოდენობა კი ამ დარღვევებზე შესაბამისად, 50 და 40 ლარს შეადგენს.
დარღვევათა ტოპ-ათეულში, რის გამოც ყველაზე მეტი ჯარიმა გამოიწერა, ასევე მოხვდნენ:
- მექანიკური სატრანსპორტო საშუალების მართვის დროს მძღოლის მიერ მობილური კომუნიკაციის საშუალებით სარგებლობა - 83 003 ჯარიმა, სანქციის ოდენობა - 30 ლარია;
- მარეგულირებლის ან შუქნიშნის ამკრძალავ ნიშანზე გავლის წესების, პრიორიტეტული ან ამკრძალავი ნიშნის მოთხოვნის დაუცველობა, გასწრების, გზაჯვარედინის, რკინიგზაზე გადასასვლელის გავლის წესების დარღვევა, გავლის უპირატესობის მქონე სატრანსპორტო საშუალებისათვის დაბრკოლების შექმნა - 78 379 საჯარიმო ქვითარი, სანქციის ოდენობა - 30 ლარია;
- გზის სავალ ნაწილზე სატრანსპორტო საშუალებათა განლაგების, მოძრაობის დაწყების ან/და მანევრირების წესების დარღვევა - 51 848 ჯარიმა, სანქციის ოდენობა - 50 ლარი;
- სატრანსპორტო საშუალების მართვა, რომელსაც აქვს გაუმართავი სამუხრუჭე სისტემა, საჭის სამართავი მექანიზმი ან მისაბმელი მოწყობილობა, მწყობრიდანაა გამოსული ფარები, უკანასაგაბარიტო მაშუქები დღე-ღამის ბნელ დროს, ან მინის საწმენდი მექანიზმი წვიმის ან თოვლის დროს, ანდა დარღვეულია ძრავის კვების სისტემის ჰერმეტულობა - 42 300 ჯარიმა, სანქციის ოდენობა - 15 ლარი;
- სატრანსპორტო საშუალების მართვა ალკოჰოლური სიმთვრალის მდგომარეობაში, ან სატრანსპორტო საშუალების მართვისას ალკოჰოლური სიმთვრალის დასადგენად შემოწმებისათვის თავის არიდება - 20 244 ჯარიმა. აღნიშნული დარღვევა - მართვის უფლების 6 თვით; 18 წლის ასაკს მიუღწეველი პირისთვის კი მართვის უფლების 1 წლით შეჩერებას იწვევს.
