მეორად ბინებზე მოთხოვნა შემცირდა - რა ღირს ძველი სახლები თბილისში
თბილისში ახალაშენებული კორპუსების ანალოგიურად მოთხოვნა მეორად ბინებზეც შემცირდა.
თუ პირველ შემთხვევაში მიზეზი საბანკო რეგულაციების შედეგად სესხების გაცემის შეზღუდვაა, მეორადი ბინების რეალიზაციის შემცირება ძირითადად მაღალ ფასს უკავშირდება.
უძრავი ქონების სააგენტოს წარმომადგენლები „ბიზნესპრესნიუსთან“ საუბრისას აცხადებენ, რომ ხშირად ახალი აშენებული ბინის ფასსა და ძველი ბინის ღირებულებას შორის განსხვავება მინიმალურია, რაც მყიდველში ინტერესს აღარ იწვევს.
ახალაშენებულ კორპუსებში ბინების რეალიზაციის შემცირების ფონზე, „ბიზნესპრესნიუსი“ დაინტერესდა, რა ღირს თბილისში ძველი აშენებული ბინები და არის თუ არა მოთხოვნა ასეთ სახლებზე. უძრავი ქონების პორტალ SS.ge-დან გამოთხოვილი ინფორმაციით ვგებულობთ, რომ ძველი აშენებული ბინების ფასი ზოგიერთ უბანში შემცირებულია.
მაგალითად, დიდუბე-ჩუღურეთის რაიონში ძველი აშენებული (მეორადი) ბინის ფასი (ერთ კვადრატული მეტრი) დაახლოებით 350 დოლარიდან იწყება, მაშინ როდესაც რამდენიმე თვის წინ 400 დოლარი იყო.
ისანი-სამგორში კვადრატული მეტრის ფასი 350 დოლარიდან იწყება, მაშინ როდესაც მინიმალური ფასი 400 დოლარი იყო. გლდანი-ნაძალადევის რაიონში კი ბინის კვადრატული ფასი 500 დოლარიდან იწყება. 500 დოლარიდან იწყება ბინის ფასი ძველ თბილისში და ყველაზე ძვირი ფასი ვაკე-საბურთალოს რაიონშია, სადაც ბინის ფასი 550 დოლარიდან იწყება, მაშინ როდესაც რამდენიმე თვის წინ მინიმალური თანხა 600 დოლარი იყო.
აღსანიშნავია, რომ აღნიშნული ფასი საბოლოო არ არის და ხშირად მყიდველსა და მეპატრონეს შორის ხდება ფასის დაკლება. გარდა ამისა, ხშირია განცხადება, სადაც წერია, რომ ფასი საბოლოო არაა და შეიძლება შეთანხმება. ამიტომ რთულია ბინის მინიმალური ფასი დაადგინო.
როგორც უძრავი ქონების სააგენტოს „კიბეს“ დირექტორმა ნელი გოგუაძემ „ბიზნესპრესნიუსთან“ საუბრისას განაცხადა, მეორადი ბინების გაყიდვა შემცირებულია.
„მეორადი ბინა თითქმის ყველა შემთხვევაში სარემონტოა, გარემონტებული კი იშვიათად არის და ის ახალაშენებული თეთრი კარკასის ფასს უტოლდება.
ხშირ შემთხვევაში, მყიდველების 60-75% აქცენტს ახალაშენებულ ბინებზე აკეთებს, რადგან ურჩევნიათ თეთრი კარკასი, რომელიც უკვე სარემონტოდ არის გამზადებული, ვიდრე ძველი რემონტი. ამას ისიც ემატება, რომ ახალი კორპუსია. მიუხედავად ამისა, ადამიანების მცირე რაოდენობაა, რომელიც ახალ აშენებულ ბინებს არ ენდობა, ხოლო მსხვილ კომპანიებში, რომელსაც ცოტა ენდობიან, იქ მაღალი ფასია. შესაბამისად, ფასს ვერ წვდებიან და ამიტომაც ძველი ბინებისკენ მიდიან.
თუმცა ამ შემთხვევაში კორპუსს დიდ მნიშვნელობას ანიჭებენ, აქცევენ ყურადღებას აქვს თუ არა მიშენება, რამდენად მყარია და ა.შ. ყველას თავისი მოთხოვნა აქვს,“ - განაცხადა ნელი გოგუაძემ.
მისი თქმით, მეორად ბინებზე ფასების შემცირება ინდივიდუალურია. დაახლოებით 10-15% ბინას თანხას კატეგორიულად არ აკლებს და შესაბამისად, ბინის გაყიდვაც თვეების განმავლობაში გრძელდება.
„ძველ აშენებულ ბინებზე მოთხოვნა საბურთალოზე გვაქვს. ე.წ სტალინკებზე, ესაა მაღალჭერიანი, სქელი კედლებით. მართალია, ულიფტოა, მაგრამ ძირითადად მაღალსართულიანები არ არის.
„ხრუშჩოვკებზე“ ძალიან დაბალი მოთხოვნაა, შეიძლება ითქვას, პრაქტიკულად არაა. ბინა შესაძლოა, ძალიან კარგ მდგომარეობაში იყოს, მაგრამ კორპუსის ხარისხი იყოს ცუდი. ბინა პოტენციურ მყიდველში ინტერესს არ იწვევს, თუ იგებს, რომ კორპუსს მიშენება აქვს. ასევე ძნელად იყიდება დიდი ბინები, დაახლოებით, 100 კვადრატზე მეტი,“ - აღნიშნა გოგუაძემ.
