რისი გათვალისწინება მოუწევთ მძღოლებს ავტომობილის გადაკეთების შემთხვევაში
„მექანიკური სატრანსპორტო საშუალების გადაკეთების წესების“ ტექნიკურ რეგლამენტში მთავრობამ ცვლილება შეიტანა. ამის შესახებ მთავრობის 15 მარტის დადგენილებაშია აღნიშნული.
მათ შორის ერთ-ერთი ცვლილება, რაზეც არის საუბარი დადგენილებაში, ეხება გადაკეთებული სატრანსპორტო საშუალების ინსპექტირებას.
კერძოდ, ახალი დადგენილების მიხედვით, მფლობელი ვალდებული იქნება, სატრანსპორტო საშუალების გადაკეთების და ამ ცვლილების რეგისტრაციის დასრულებიდან არაუგვიანეს 3 კალენდარულ დღეში, გადაკეთებული სატრანსპორტო საშუალების პერიოდული ტექნიკური ინსპექტირება განახორციელოს.
რაც შეეხება გადაკეთებული მექანიკური სატრანსპორტო საშუალების ინსპექტირების ანგარიშს, ის უნდა შეიცავდეს შემდეგ მონაცემებს:
- მექანიკური სატრანსპორტო საშუალების გადაკეთებაზე ინსპექტირების ანგარიშის სარეგისტრაციო ნომერს, თარიღს;
- ინსპექტირების ცენტრის დასახელებას;
- ინსპექტირების ცენტრის მისამართს, ტელეფონის ნომერს;
- ინსპექტირების ცენტრის ხელმძღვანელის გვარს, სახელს;
- ინსპექტირების ცენტრის აკრედიტაციის მოწმობის ნომერს;
- მექანიკური სატრანსპორტო საშუალების მახასიათებლების საწყის მონაცემებს, როგორიცაა: მფლობელი; VIN კოდი (საიდენტიფიკაციო ნომერი); დამამზადებლის საფირმო დასახელება; მარკა და ტიპი ან/და მოდელი; ძრავას მარკა; ძრავას მუშა მოცულობა (სმ3) და სიმძლავრე (კვტ/ცხძ); სრული მასა, კგ; აღჭურვილი (საკუთარი) მასა, კგ; ღერძებზე მოსული მასები დატვირთვით, წინა/უკანა, კგ; ღერძებზე მოსული მასები დატვირთვის გარეშე, წინა/უკანა, კგ; გაბარიტული ზომები, მმ;
- მექანიკური სატრანსპორტო საშუალების გადაკეთების შედეგად შეცვლილ მახასიათებლებსა და მათ მნიშვნელობას;
- დასკვნას ტექნიკური დოკუმენტაციის მიხედვით;
- ინსპექტირების ცენტრის პასუხისმგებელი პირის გვარს, სახელს, ხელმოწერას, ბეჭედს.
შეგახსენებთ, რომ რეგლამენტი, რომელიც 2014 წლიდან მოქმედებს ქვეყანაში, საქართველოს ტერიტორიაზე რეგისტრირებული მექანიკური სატრანსპორტო საშუალებების კონსტრუქციაში ცვლილებების შეტანის პირობებსა და პროცედურებს ადგენს.
ტექნიკური რეგლამენტი ვრცელდება საქართველოში რეგისტრირებულ ან რეგისტრაციისათვის განკუთვნილ ყველა სახის მექანიკურ სატრანსპორტო საშუალებაზე, გარდა მოპედისა, აგრეთვე იმ სატრანსპორტო საშუალებისა, რომელზეც ხდება აირბალონიანი მოწყობილობის განთავსება, მოხსნა, დაყენება და პარამეტრების შეცვლა.
