ეროვნული ბანკის პრეზიდენტი მიკროსაფინანსო ორგანიზაციების ხელმძღვანელებს შეხვდა
საქართველოს ეროვნული ბანკის პრეზიდენტი კობა გვენეტაძე, კომერციული ბანკების შემდეგ, დღეს მიკროსაფინანსო ორგანიზაციების ხელმძღვანელებს შეხვდა. ამის შესახებ ინფორმაციას ეროვნული ბანკი ავრცელებს.
ეროვნული ბანკის ინიციატივით გამართულ შეხვედრაზე კობა გვენეტაძემ არასაბანკო სექტორის წარმომადგენლებს პასუხისმგებლიანი დაკრედიტების რეგულაციების პირველადი შედეგები გაუზიარა. ეროვნული ბანკის ინფორმაციით, მონაცემების დინამიკა სებ-ის მოლოდინებთან სრულად შესაბამისია.
ეროვნული ბანკის პრეზიდენტის განცხადებით, მსგავსი სამუშაო შეხვედრები ეროვნულ ბანკში მუდმივად იმართება, რაც სისტემის ეფექტიანობის გაზრდაზეა ორიენტირებული. კობა გვენეტაძემ აღნიშნა, რომ ეროვნული ბანკი მიმდინარე პროცესებზე დაკვირვებას ინფორმაციის მოპოვებით და სტატისტიკური მასალის ანალიზზე დაყრდნობით განაგრძობს, რის შედეგადაც, საჭიროების შემთხვევაში, ცვლილებებს განახორციელებს ისე, რომ რეგულაციების ძირითადი პრინციპები შენარჩუნდება.
ხაზგასასმელია, რომ საცალო დაკრედიტების რეგულირება, რაც საუკეთესო საერთაშორისო პრაქტიკით ხორციელდება, მნიშვნელოვანია საფინანსო სექტორის სტაბილური და ეფექტიანი ფუნქციონირებისთვის. ანალოგიური ტიპის რეგულაცია ბოლო პერიოდში ევროპის რამდენიმე ქვეყანაში - ლიეტუვაში, უნგრეთში, შვედეთში, დანიაში, ჩეხეთში, ესტონეთში და სხვა - დაინერგა.
მიკროსაფინანსო ორგანიზაციების წარმომადგენლებთან შეხვედრა კითხვა-პასუხის რეჟიმში წარიმართა და სებ-ის პრეზიდენტმა და მენეჯმენტის სხვა წევრებმა მიკროსაფინანსო ორგანიზაციების წარმომადგენლებს თემატურ საკითხებზე ამომწურავი ინფორმაცია მიაწოდეს.