მილიონერების გლობალური მიგრაცია იზრდება - რომელ ქვეყნებში გადადიან მდიდრები საცხოვრებლად
2018 წელს მსოფლიოში მდიდრების მიგრაცია დაჩქარდა. Global Wealth Migration Review-ს მიხედვით, 2018 წელს საცხოვრებელი ქვეყანა დაახლოებით 108,000-მა დოლარიანმა მილიონერმა შეიცვალა, 2017 წელს კი 95,000-მა. ამასთან, მთლიანი კერძო სიმდიდრე მთელს მსოფლიოში 204 ტრილიონ დოლარს შეადგენს.
Global Wealth Migration Review-ს მიხედვით, 2018 წლის განმავლობაში რუსეთი 7 ათასმა დოლარიანმა მილიონერმა დატოვა. მდიდარი ადამიანების მხრიდან ქვეყნის დატოვების მაჩვენებლით რუსეთი მეორე ადგილს იკავებს, პირველ ადგილზე კი ჩინეთია, რომელიც 15 ათასმა მილიონერმა დატოვა. სიაში მესამე ადგილს ინდოეთი იკავებს, რომელიც 5 ათასმა ყველაზე მდიდარმა მოქალაქემ დატოვა. მეოთხე ადგილზეა თურქეთი, მეხუთეზე კი საფრანგეთი, რომელიც 3 ათასმა მილიონერმა დატოვა.
კვლევის მიხედვით, მილიონერების სასურველი საცხოვრებელი ადგილი ავსტრალიაა. სწორედ ავსტრალიაში გადავიდა საცხოვრებლად მილიონერთა უმეტესი ნაწილი. ერთი წლის განმავლობაში ავსტრალიაში 12 ათასი მილიონერი გადავიდა საცხოვრებლად. მეორე ადგილზე აშშ-ია, სადაც საცხოვრებლად 10 ათასი მილიონერი გადავიდა. კვლევის მიხედვით, მესამე ადგილს კანადა იკავებს.
მოამზადა ეკა გადახაბაძემ