როდიდან შეგვეძლება 12 ახალი მიმართულებით ფრენა ქუთაისიდან - ბილეთების ნაწილი უკვე გაყიდულია
ქუთაისის აეროპორტიდან ევროპის მიმართულებით 12 ახალი მიმართულება ემატება.
ესენია: ფრანკფურტი, ჰამბურგი, ბადენ-ბადენი, ვენეცია, ნეაპოლი, ნიცა, პიზა, სტოკჰოლმი, ნიურნბერგი, პოზნანი, ჰერაკლიონი და ტურკუ.
კერძოდ, „ვიზეარი“ 2019 წლის ბოლოდან რეგულარულ ფრენებს ევროკავშირის ქვეყნების 7 მიმართულებით: პოზნანი, ჰამბურგი, ნეაპოლი, ვენეცია, პიზა, ფრანკფურტი და ბადენ-ბადენში შეასრულებს. ხოლო, 2020 წლის ზაფხულიდან კიდევ ევროპის ხუთი ახალი მიმართულება: სტოკჰოლმი, ნიურნბერგი, ტურკუ, ნიცა და ჰერაკლიონი დაემატება. აღსანიშნავია, რომ საქართველოდან დღემდე ფინეთსა და შვედეთში პირდაპირი რეგულარული საჰაერო მიმოსვლა არ სრულდება.
ცნობისთვის, ახალ მიმართულებებზე ბილეთების გაყიდვა უკვე დაწყებულია და მათი ნაწილი უკვე გაიყიდა კიდეც. რაც შეეხება ფრენების დაწყების კონკრეტულ თარიღებს, თითოეული მიმართულების შემთხვევაში, ასე გამოიყურება:
- ვენეცია - 2019 წლის 21 დეკემბერი;
- ნიცა - 2020 წლის 3 ივლისიდან;
- ნეაპოლი - 2019 წლის 20 დეკემბერი;
- პიზა - 2019 წლის 18 დეკემბრიდან;
- ფრანკფურტი - 2019 წლის 19 დეკემბერი;
- ბადენ-ბადენი - 2019 წლის 18 დეკემბრიდან;
- სტოკჰოლმი - 2020 წლის 1-ლი ივლისიდან;
- ნიურნბერგი - 2020 წლის 3 ივლისიდან;
- ტურკუ - 2020 წლის 3 ივლისიდან;
- ჰერაკლიონი - 2020 წლის 4 ივლისიდან;
- პოზნანი - 2019 წლის 18 სექტემბრიდან;
- ჰამბურგი - 2019 წლის 20 დეკემბერი.
2020 წლის ზაფხულისთვის ქუთაისის საერთაშორისო აეროპორტიდან პირდაპირი რეგულარული რეისები ევროკავშირის უკვე 19 ქვეყნის 39 მიმართულებით იქნება შესაძლებელი.
ავიაკომპანია „ვიზ ეარმა“ ქუთაისის საეთაშორისო აეროპორტიდან ოპერირება 2012 წელს დაიწყო. 2016 წლის სექტემბერში ქუთაისის საერთაშორისო აეროპორტში, რეგიონში ავიაკომპანიის პირველი ბაზა გაიხსნა. 2017 წლის მაისში ქუთაისის საერთაშორისო აეროპორტს „ვიზ ეარს“ მეორე ბაზირებული საჰაერო ხომალდი და ევროპის ხუთი ყველაზე მოთხოვნადი მიმართულება დაემატა. 2018 წელს „ვიზ ეარმა“ ქუთაისის საერთაშორისო აეროპორტის მგზავრთნაკადის 95 პროცენტი გადაიყვანა ( 587 643 მგზავრი) და საქართველოს ავიაციის ისტორიაში პირველად, „ვიზ ეარი“ ბაზრის ლიდერი გახდა.
