„ვგმობთ რუსეთის ფედერაციის  თვითნებურ გადაწყვეტილებას, სანქციები დააკისროს საქართველოს“

რუსეთის მხრიდან საჰაერო მიმოსვლის შეჩერებისა და ქართულ ღვინოზე კონტროლის გამკაცრებას საერთაშორისო სავაჭრო პალატის ეროვნული კომიტეტი საქართველოში გმობს. ამის შესახებ კომიტეტი განცხადებას ავრცელებს.

„იმისდა მიუხედავად, რომ ზემოთ აღნიშნულ სანქციებს საქართველოს ეკონომიკაზე ექნება შეზღუდული გავლენა, ის მაინც მიაყენებს ზარალს ბიზნესებს, რომლებიც ექსკლუზიურად რუს ტურისტებსა და რუსულ ბაზარზე იყვნენ დამოკიდებული.

ICC-Georgia-მ მოახდინა რესურსების მობილიზება როგორც ადგილობრივ, ასევე საერთაშორისო დონეზე, რათა შევამსუბუქოთ მოცემული სანქციების ზარალი ქართულ ბიზნესებზე. შეიქმნა სამუშაო ჯგუფი, რომელიც ითანამშრომლებს და დაეხმარება საქართველოს ეროვნული ტურიზმის ადმინისტრაციას, რათა ვუზრუნველყოთ სწრაფი რეაგირება და გავუწიოთ ზედამხედველობა მიმდინარე პროცესებს, ამასთანავე დავეხმაროთ ქართულ ღვინის მწარმოებლებს, იპოვონ ახალი მარკეტი ღვინის გასატანად, რისთვისაც ჩვენ გამოვიყენებთ საერთაშორისო სავაჭრო პალატის ეროვნულ კომიტეტებს 130 ქვეყანაში.

ICC-Georgia გამოთქვამს წუხილს 20 ივნისს მომხდართან დაკავშირებით, ღამე, როდესაც 220-ზე მეტი ადამიანი დაშავდა. ICC-Georgia მიიჩნევს, რომ მშვიდობიანი აქციები ეს არის ჯანსაღი დემოკრატიის გამოხატულება, თუმცა ამის მიუხედავად, მივიჩნევთ, რომ პროტესტების გაგრძელება მნიშვნელოვან ზიანს მიაყენებს ბიზნესებს და ეკონომიკას და დააზარალებს პოლიტიკური სპექტრის ყველა მხარეს. ICC-Georgia მოვუწოდებთ მთავრობას, პოლიტიკურ პარტიებს და სამოქალაქო საზოგადოებას რომ დაიწყონ კონსტრუქციული დიალოგი, რათა ქართველი ხალხის მოთხოვნებს გაეცეთ პასუხი. ქუჩებში აქციების გაგრძელებამ შეიძლება რუსეთის სანქციებზე უფრო მძიმე შედეგებამდე მიიყვანოს ჩვენი ეკონომიკა,“ - ნათქვამია განცხადებაში.