"რაც უფრო მალე გადავერთვებით პოზიტიური შენების დღის წესრიგზე, მით უფრო მარტივად გავუმკლავდებით გამოწვევებს"
როდესაც ვსაუბრობთ ისეთ მაჩვენებლებზე, როგორიცაა ლარის კურსი, ეკონომიკის ზრდა, ტურიზმის განვითარების პერსპექტივები და ა.შ., უნდა გავითვალისწინოთ მოლოდინების ფაქტორიც,- ამის შესახებ ეკონომიკისა და მდგრადი განვითარების მინისტრმა ნათია თურნავამ განაცხადა.
მისი თქმით, ეკონომიკა არის ანარეკლი იმ პროცესებისა, რაც ხდება პოლიტიკაში.
„ამიტომ, რაც უფრო პასუხისმგებლიანად მივუდგებით ყველანი ეკონომიკას, რაც უფრო მალე გადავერთვებით პოზიტიური შენების დღის წესრიგზე და რაც უფრო მალე მოხდება სტაბილიზაცია და დაიმკვიდრებს სიმშვიდე, მით უფრო მარტივად გავუმკლავდებით ამ გამოწვევებს”.
როგორც მინისტრმა ტურიზმის სექტორში მიმდინარე მოვლენების შეფასებისას აღნიშნა, ტურიზმი საქართველოში დიდი გამოწვევების წინაშე დადგა, რადგან აღნიშნულ სექტორში ბევრი ოჯახია ჩართული.
„მათ იციან, რომ შეიძლება ვერ მიიღონ ის შემოსავალი, რომელსაც ელოდნენ, ესაც არის ნეგატიური მოლოდინის ერთ-ერთი ფაქტორი,” - განაცხადა ნათია თურნავამ.
მინისტრის თქმით, რუსეთის მხრიდან პირდაპირი ავიაფრენების შეჩერებით გამოწვეული ზარალის სრულად ნეიტრალიზება შეუძლებელია.
„ვმუშაობთ 2 ძირითადი მიმართულებით: ერთი მიმართულებაა, კიდევ ერთხელ გავაჟღეროთ, რომ საქართველო არის უსაფრთხო ტურისტული ქვეყანა და ამისთვის ვიყენებთ ბევრ საშუალებას, მათ შორის დიპლომატიურ არხებს და მეორეც - რატომ ვხვდები ბიზნესს და რატომ პირველივე დღეს არ გამოვედით წინასწარ ჩამოყალიბებული გეგმით? მე მინდოდა ბიზნესიდან მიმეღო იმპულსები, შესაბამისად, დავინახე, რომ მოთხოვნა სხვა ბაზრების განვითარებასთან ერთად, ისიცაა, რომ შევინარჩუნოთ რუსი ტურისტებიც. ეს არის ბიზნესის მოთხოვნა. ეს არის საკმაოდ ყურადსაღები ტენდენცია და ჩვენ ვალდებული ვართ, ვიმუშაოთ ამ მიმართულებითაც,“ - განუცხადა ეკონომიკისა და მდგრადი განვითარების მინისტრმა ტელეკომპანია „იმედს“.
ინფორმაციას ეკონომიკისა და მდგრადი განვითარების სამინისტრო ავრცელებს.