მარნეულის მუნიციპალიტეტის სოფლებში სტიქიის შედეგად მიყენებულ ზარალს ითვლიან

მარნეულის მუნიციპალიტეტის სოფლებში სტიქიის შედეგად მიყენებულ ზარალს ითვლიან. ძლიერმა სეტყვამ და ქარმა გუშინ საღამოს, მარნეულის მუნიციპალიტეტის რამდენიმე სოფლის მოსახლეობას საცხოვრებელი სახლების სახურავები და სასათბურე მეურნეობები დაუზიანა, ადგილობრივებს მთლიანად გაუნადგურდა ბოსტნეული, ხეხილის ბაღები და ვენახები.

მარნეულში ძლიერი სეტყვის შედეგად დაზიანებული სახლების დროებით გადახურვის მიზნით, ადგილობრივმა თვითმმართველობამ მოსახლეობა დილითვე უზრუნველყო სპეციალური ტენტებით, რომელიც დღის განმავლობაში ყველა დაზარალებულს დაურიგდება.

სტიქიისგან დაზარალებულ ოჯახებს დღეს მარნეულის მერი ზაურ დარგალი, ქვემო ქართლის გუბერნატორის მოადგილე ზვიად ჭუნაშვილი, საკრებულოს თავმჯდომარის მოადგილე მამუკა ნავერიანი, საქართველოს პარლამენტში მარნეულის მაჟორიტარი დეპუტატები თამაზ ნავერიანი, რუსლან გაჯიევი შეხვდნენ და ადგილზე შექმნილ სიტუაციას გაეცნენ.

ცენტრალური და ადგილობრივი ხელისუფლების წარმომადგენლებმა, ადგილობრივ მოსახლეობას დახმარება აღუთქვეს. ამ დრომდე, საგანგებო რეჟიმში მუშაობენ მარნეულის მერიის სამსახურები, სტიქიისგან მიყენებულ ზარალს კი სპეციალური კომისია სწავლობს. ძლიერმა სეტყვამ და ქარმა, სოფელ იმირის, წითელსოფელის, ხიხანის, მარადისისა და საიმერლოს მოსახლეობას მიაყენა ზარალი.