მიხეილ ხიდურელი და სოლომონ პავლიაშვილი სოფელ ხაშმში სასტუმროს გახსნიან
20 ივლისს, სააგენტოს “აწარმოე საქართველოში“ დირექტორი მიხეილ ხიდურელი და გარემოს დაცვისა და სოფლის მეურნობის მინისტრის მოადგილე სოლომონ პავლიაშვილი კახეთში, სოფელ ხაშმში სასტუმროს - “შატო ხაშმი“ გახსნიან.
სააგენტოს “წარმოე საქართველოში“ მიერ გავრცელებული ინფორმაციით, 11-ნომრიანი სასტუმრო, რომელშიც ქართული ტრადიციული კერძების რესტორანი იქნება განთავსებული, მიმზიდველი ლოკაცია იქნება, როგორც ტურისტებისთვის, ასევე ადგილობრივი ვიზიტორებისთვის. ასევე, ნებისმიერ ადგილობრივ დამსვენებელსა თუ ტურისტს საშუალება ექნება სასტუმროში არსებულ მარანში ღვინის დაწურვის ტრადიციას გაეცნოს და ქართული ღვინო დააგემოვნოს.
როგორც სააგენტოში აცხადებენ, ახალი სასტუმროს გახსნა ხელს შეუწყობს როგორც ადგილობირივი მოსახლეობის დასაქმებას, ასევე საქართველოში ტურიზმის ინდუსტრიის განვითარებას.
შპს “შატო ხაშმი“ სახელმწიფო პროგრამის “აწარმოე საქართველოში“ სასტუმრო ინდუსტრიის განვითარების კომპონენტის ფარგლებში ფინანსური მხარდაჭერით სარგებლობს, რაც იმას ნიშნავს, რომ პირველი 2 წლის განმავლობაში აღებული სესხის საპროცენტო განაკვეთის 10%-ს სააგენტო “აწარმოე საქართველოში“ დაფარავს. აღნიშნული პროექტის ინვესტიციის ჯამური მოცულობა კი 1 650 000 ლარს შეადგენს. პროექტის შედეგად 20 სამუშაო ადგილი შეიქმნა.
2019 წლის ივნისის თვის მონაცემებით, სასტუმრო ინდუსტრიის განვითარების მიმართულების ფარგლებში მხარდაჭერილია 104 მეწარმე სუბიექტი, რომელთა ჯამური ინვესტიციის მოცულობა 279,6 მლნ ლარს შეადგენს, ხოლო აღნიშნული 104 სასტუმრო შექმნის 3 200-ზე მეტ დამატებით ოთახს და 2 800-ზე მეტ ახალ სამუშაო ადგილს.