ქართველი ფერმერი ქალი საკუთარ მეურნეობას ყიდის, რომლის საინვესტიციო ღირებულება 2.5 მლნ-ია
ქართველი ფერმერი ქალი საკუთარ მეურნეობას ყიდის.
საუბარია, ფერმერთა ასოციაციის თავმჯდომარე ნინო ზამბახიძეზე, რომელიც ახალციხეში, ახალციხის რაიონ სოფელი წნისში სახნავ-სათეს მიწის ნაკვეთებს ფლობდა.
როგორც ზამბახიძემ „ბიზნესპრესნიუსს“ განუცხადა, ის საკუთარ მეურნეობას სრულად ყიდის. რაც შეეხება ღირებულებას, ზამბახიძე აღნიშნავს, რომ ქონების შეფასებას აუდიტი აკეთებს და შემდეგ უკვე მოლაპარაკების საკითხი იქნება, თუმცა, მისივე თქმით, საინვესტიციო ღირებულება 2.5 მლნ-ია.
სამომავლო გეგმებთან დაკავშირებით კი, ნინო ზამბახიძე აღნიშნავს, რომ ფერმერთა ასოციაციაში გააგრძელებს საქმიანობას და არც იმას გამორიცხავს, რომ სოფლის მეურნეობის სხვა პროექტი დაიწყოს, აგროტურიზმის მიმართულებით.
შეგახსენებთ, რომ ზამბახიძემ ფერმერული მეურნეობის გაყიდვის შესახებ 2019 წლის იანვარში განაცხადა. როგორც ზამბახიძე აცხადებდა, ამის მიზეზი სახელმწიფო შესყიდვებში არსებული ბიუროკრატია და ხარვეზები იყო.
„8 წელი ახალციხეში ვიცხოვრე იმ იდეით, რომ ხარისხიანი პროდუქტი მეწარმოებინა, გრანტებიც მოვიგე და საქართველოს რეალობისთვის დიდი ფერმერული მეურნეობის მეპატრონეც გავხდი. ბევრი გამოწვევა იყო ამ პერიოდის განმავლობაში.. ეხლაც მოგებული ტენდერი წავაგეთ! ასე რომ, ბევრი რომ აღარ ვილაპარაკო, ყველაფერს - რასაც შევწირე თავი, რის გამოც სოფელში გადავედი საცხოვრებლად და შვილები ფაქტობრივად, დედის გარეშე დავტოვე, რასაც შეეწირა ჩემი ოჯახი, ანუ ჩემს ფერმერულ მეურნეობას ვყიდი,“-აცხადებდა მაშინ ზამბახიძე.
