ქართულ ბაზარზე ყვითელი საზამთრო გამოჩნდა
ქართულ ბაზარზე ყვითელი საზამთრო გამოჩნდა.
პროდუქტს ლაგოდეხში, კერძოდ, სოფელ ლელიანში დავით ჭუმბურიძე აწარმოებს და მისი ღირებულება 3 ლარია (1 კგ). როგორც ყვითელი საზამთროს მწარმოებელი „ბიზნესპრესნიუსთან“ საუბრისას აცხადებს, იქიდან გამომდინარე, რომ პროდუქტი ძალიან მოთხოვნადია, სამომავლოდ წარმოებას აუცილებლად გაზრდის.
დავით ჭუმბურიძის ინფორმაცით, ის ამ ეტაპზე ერთადერთი მწარმოებელია, რომელმაც პროდუქტი ქართულ ბაზარში შეიტანა და უკვე რამდენიმე მაღაზიასაც ამარაგებს.
ცნობისთვის, ყვითელი საზამთრო გარეგნულად ისეთივეა, როგორ წითელი, შიგნით კი ღია ყვითელი ფერისაა. ამასთან, პროდუქტი გაცილებით ნაკლებ კურკას შეიცავს, ვიდრე წითელი ფერის საზამთრო.
როგორც ცნობილია, ზაფხულობით იგი ესპანეთში მოჰყავთ, ხოლო ზამთარში ტაილანდში. ამასთან, საზამთროს შეჯვარებული ჯიშები რუსეთში და უკრაინაშიც გვხვდება.
„ლაგოდეხის სოფელ ლელიანში 80 ძირი ყვითელი საზამთროს წარმოება, წელს დავიწყე. თესლი მეგობარმა მომცა, თუ არ ვცდები, ტაილანდიდან არის ჩამოტანილი. კომპანია არ მაქვს, ვარ იდივიდუალური მეწარმე, ამიტომ ბაზარშიც და რამდენიმე მაღაზიაშიც მე თვითონ შემაქვს. ყვითელი საზამთროს მოყვანა-რეალიზაციით ამ ეტაპზე მხოლოდ მე ვარ დაკავებული.
პროდუქტი ძალიან მოთხოვნადია. ტურისტები პირდაპირ მოდიან და ყიდულობენ, ქართველებში უფრო გაკვირვებას იწვევს, მაგრამ ინტერესის გამო მაინც ყიდულობენ. სხვათაშორის, ძალიან გემრიელია და რაც მთავრია, სასუქის გარეშე მოდის“,-აცხადებს დავით ჭუმბურიძე.
როგორც ფერმერი ამბობს, ყვითელი საზამთრო ტროპიკული ხილის კატეგორიაში გადის და მოთხოვნიდან გამომდინარე, დაინტერესებულია, რომ სამომავლოდ სხვა მსგავსი სახეობის პროდუქტებიც აწარმოოს.
