მამუკა ბახტაძე - მთის განვითარება მნიშვნელოვან პრიორიტეტს წარმოადგენს
პრემიერ-მინისტრმა მამუკა ბახტაძემ დუშეთის ისტორიული უბნის სარეაბილიტაციო სამუშაოები დაათვალიერა. მამუკა ბახტაძის თქმით, რეგიონში წლების განმავლობაში წყლით მომარაგების პრობლემა იდგა და ხელისუფლებამ აღნიშნულის მოგვარება დაიწყო.
„დღეს დავათვალიერეთ ცენტრი, სადაც მიმდინარეობს ძალიან მნიშვნელოვანი სარეაბილიტაციო სამუშაოები. 2020 წლის ივნისს დავასრულებთ სამუშაოებს და მოსახლეობას ვპირდებით, რომ ეს ადგილი იქნება ერთ-ერთი ყველაზე ლამაზი ადგილი საქართველოში. ამ რეგიონს აქვს ძალიან უნიკალური ტურისტული პოტენციალი და შესაბამისად, აღნიშნული პროექტების განხორციელება ძალიან მნიშნველოვანია, რაც შეიძლება მოკლე ვადებში, რომ ადგილობრივმა მოსახლეობამ მეტი ეკონომიკური სარგებელი მიიღოს. ჩვენ ამ პროექტების რეალიზაციაში მსოფლიო ბანკი გვეხმარება.
მოგეხსენებათ, რომ მთის განვითარება წარმოადგენს ჩვენი ხელისუფლების ძალიან მნიშვნელოვან პრიორიტეტს. ძალიან ბევრი რამ გაკეთდა ამ წლების განმავლობაში. განსაკუთრებით კანონის მიღების შემდეგ. ჩვენ აქტიურად დავიწყეთ ინტერნეტიზაცია, ჩვენი ამოცანაა ყველა დასახლებაში მივიყვანოთ ინტერნეტი. ინტერნეტის განვითარების გარეშე ეს ულამაზესი ადგილები ვერ შეძლებენ თავიანთი ტურისტული პოტენციალის სრულფასოვან ათვისებას.
ძალიან მნიშვნელოვანი გზა გაიჭრა სოფელ არხოტამდე. წლების განმავლობაში სოფელი მოწყვეტილი იყო გარესამყაროს. მას აქვს სტრატეგიული მნიშნველობა ჩვენი ქვეყნისთვის და აქვს ამასთანავე უნიკალური ტურისტული პოტენციალი“,-განაცხადა პრემიერ-მინისტრმა.