„საქართველოს რკინიგზა“ - ქვიშხეთში გაფიცულებს „საქართველოს რკინიგზასთან“ სამართლებრივი კავშირი არ აქვთ - რკინიგზა შეუფერხებლად მუშაობს

„საქართველოს რკინიგზა“ ქვიშხეთში, აღმოსავლეთ-დასავლეთ საქართველოს დამაკავშირებელი სარკინიგზო გვირაბის მშენებლობაზე დასაქმებულების პროტესტს ეხმაურება. როგორც „საქართველოს რკინიგზა“ გავრცელებულ განცხადებაში აღნიშნავს, მას არავითარი შრომით-სამართლებრივი კავშირი პროცესთან არ აქვს. განცხადებაში ასევე ნათქვამია, რომ ნებისმიერი მცდელობა მიმდინარე პროტესტი დაუკავშირდეს სს „საქართველოს რკინიგზას“, ემსახურება დესტაბილიზაციის განცდის დანერგვას.

„საქართველოს რკინიგზას“ „ჩინეთის რკინიგზის 23-ე ბიუროსთან“ გაფორმებული აქვს ხაშური-მოლითის ახალი სარკინიგზო მონაკვეთის სამშენებლო ხელშეკრულება 2011 წელს ჩატარებული საერთაშორისო ტენდერის საფუძველზე. აღნიშნულ ობიექტზე ტექნიკურ ზედამხედველობას ასევე საერთაშორისო ტენდერის გზით გამარჯვებული კომპანია, ავსტიულ-გერმანული ILF-ისა და Deutsche Bahn-ის კონსორციუმი ახორციელებს.

ნებისმიერი მცდელობა მიმდინარე პროტესტი დაუკავშირდეს სს „საქართველოს რკინიგზას“, ემსახურება დესტაბილიზაციის განცდის დანერგვას. სრული პასუხისმგებლობით ვაცხადებთ, რომ „საქართველოს რკინიგზა“ მუშაობს შეუფერხებლად და ჩვეულებრივ რეჟიმში ხორციელდება როგორც სამგზავრო გადაყვანები, ასევე სატვირთო გადაზიდვები.

მედია საშუალებებს ვთხოვთ არ გაავრცელონ გადაუმოწმებელი და ცალმხრივი ინფორმაცია, რათა არასწორი განმარტებებით არ მოხდეს საზოგადოების შეცდომაში შეყვანა,“ - ნათქვამია „საქართველოს რკინიგზის“ განცხადებაში.